सिमकोट : समता फाउन्डेसनले हुम्लामा समता स्कुल सञ्चालनमा ल्याएकोे छ । शैक्षिक दृष्टिले पछि परेको हुम्लामा समता फाउन्डेसनले अंग्रेजी माध्यमबाट पढाइ हुने समता विद्यालय स्थापना गरेको हो ।
बुधबारदेखि सुरु भएको विद्यालयमा यस वर्ष कक्षा एकसम्म मात्रै पढाइ हुने समता फाउन्डेसनका प्रतिनिधि रवि रोकायाले जानकारी दिए । हुम्ला सदरमुकाम सिमकोटमा सञ्चालनमा आएको विद्यालयमा कमजोर आर्थिक अवस्थाका कारण अध्ययनबाट वञ्चित बालबालिकालाई निःशुल्क रूपमा गुणस्तरीय शिक्षा प्रदान गर्ने उनले बताए । ‘यो शिक्षाको युग हो । हुम्लाका नानीबाबु पनि अब आर्थिक अभावले शिक्षाबाट वञ्चित भएर बस्नुपर्ने अवस्था रहन्न’, उनले भने ।
एक सय रुपैयाँमा सिमकोटमै अंग्रेजी माध्यमबाट शिक्षा आर्जन गर्न पाउनु हुम्लाका लागि सुनौलो अवसर भएको उनले बताए । जिल्ला समन्वय समितिका संयोजक दानबहादुर रावतले विद्यालयको विकासका लागि सिंगो हुम्लाको साथ र सहयोग रहने प्रतिबद्धता व्यक्त गरे । ‘अब धनी र गरिबका विद्यार्थीले पाउने शिक्षाको विभेद अन्त्य हुन्छ’, उनले भने ।
आर्थिक अभावबाट गुज्रिएका विद्यार्थीलाई लक्ष्य गरी विद्यालय सञ्चालन गरिएको हो ।
कार्यक्रममा सिमकोट गाउँपालिकाका अध्यक्ष पदमबहादुर लामाले विद्यालयले जिल्लाको शैक्षिक गुणस्तर वृद्धि हुनुका साथै यसले शैक्षिक विभेदलाई समेत सदाका लागि अन्त्य गर्ने विश्वास व्यक्त गरे । सिमकोटको माथिल्लो बजारमा सुरु भएको समता विद्यालयको उद्घाटनमा जिल्लास्थित राजनीतिक दलका प्रतिनिधि, स्थानीय तहका जनप्रतिनिधिले विद्यालयको सफलताको शुभकामना व्यक्त गरे ।
प्रतिक्रिया दिनुहोस !
