विराटनगर : वरिष्ठ अभिवक्ता सुशील पन्तले साढे ३३ किलो सुन तस्करी र मोरङ उर्लाबारीका सनम शाक्य हत्याको थुनछेक बहसमा प्रहरी अधिकारीबीच भएको फोन संवादको अडियो रेकर्ड प्रस्तुत गरेका छन् ।
निलम्बित एसएसपी दिवेश लोहनीका पक्षमा बहस गर्दै पूर्वमहान्यायाधिवक्ता पन्तले मंगलबार तत्कालीन एआईजी बमबहादुर भण्डारीसँग भएको फोन संवाद (४८ सेकेन्ड)को रेकर्ड पेस गर्दै लोहनी निर्दोष रहेको बताए । अपराध अनुसन्धान महाशाखामा कार्यरत रहँदा लोहनीले शाक्यको हत्या भएको थाहा पाएपछि भण्डारीलाई जानकारी गराएको र उनकै निर्देशनमा त्यसपछिका कारबाही अघि बढाएको फोन संवादमा रहेको उनले सुनाए ।
सुरुमा घटनाबारे महाशाखाका सइ बालकृष्ण सञ्जेलले जानकारी पाएका थिए । मुख्य अभियुक्त ‘गोरे’ भनिने चूडामणि उप्रेतीले फोन गरेर शाक्यको हत्या भएको बारेमा जानकारी दिएपछि सञ्जेलले लोहनीलाई खबर गरेका थिए । लोहनीले भण्डारीसँग अनुमति लिएर शाक्यको शव बरामद गर्न र गोरेलगायत अभियुक्तलाई पक्राउ गर्न डीएसपी प्रजित केसीको नेतृत्वमा महाशाखाको टोलीलाई धरान पठाएको रेकर्डले प्रस्ट पारेको पन्तले बताए ।
‘जिम्मेवारी निर्वाह गर्ने क्रममा गरिएको राम्रो कामलाई पनि उल्टो बनाएर प्रहरी अधिकारीलाई फसाउन मुद्दा लगाइएको छ’, उनले बहसमा भने, ‘फोनमा गरिएको कुराकानीले पनि अपराध महाशाखा घटनाका अभियुक्त पक्राउ गर्न र शाक्यको शव बरामद गर्न केन्द्रित रहेको पुष्टि गर्छ ।’ उनले लोहनीकै सक्रियतामा मुद्दा स्थापित भएको जिकिर गर्दै भने, ‘समाजमा राम्रा काम गर्ने र अपराधमा संलग्नलाई पक्राउ गर्न सक्रिय रहेका लोहनी, केसी र सञ्जेललाई नै अभियुक्त बनाइनुपर्ने कुनै कारण छैन ।’
लोहनी र केसीलाई क्षेत्राधिकार मिची अभियुक्तलाई भाग्ने मौका दिएको अभियोग लागेको छ । पन्तले अभियुक्त भगाउनेभन्दा पनि लोहनीको सक्रियतामा घटनामा संलग्न तीन जनालाई तत्काल पक्राउ गर्न प्रहरी सफल भएको तर्क गरे । लोहनीका तर्फबाट मंगलबार अधिवक्ता रामचन्द्र सुवेदी र मोरङ बारका पूर्वअध्यक्ष देवेन्द्र कोइरालाले पनि बहस गरे ।
वादीका तर्फबाट सरकारी वकिलले शुक्रबार प्रमाणका रूपमा प्रस्तुत गरेको भिडियो रेकर्ड भने प्रतिवादी पक्षका कानुन व्यवसायीले नदेखाउन दबाब दिएपछि रोकिएको थियो । फोन रेकर्ड प्रस्तुत गरिन लाग्दा भने जिल्ला सहन्यायाधिवक्ता पदम वस्तीले पनि वादी पक्षको प्रमाण देखाउन नदिइने अनि प्रतिवादी पक्षका प्रमाणचाहिँ इजलासले सुन्ने भनेर आपत्ति जनाएपछि बहसमा माहोल तात्तिएको थियो । वस्तीले प्रमाण प्रस्तुत गर्ने र नगर्ने विषयमा वादी र प्रतिवादीबीच भेदभाव गरिएको बताए ।
वरिष्ठ अधिवक्ता टंक उप्रेती, अधिवक्ताहरू नारायण वस्ती, राजेन्द्र खनाल र केदार भण्डारीले निलम्बित सइ सञ्जेलको पक्षमा मंगलबार बहस गरे । उनीहरूले सञ्जेललाई अपराधमा संलग्नसँग नजिक रहेर सुराकी दिने भूमिका दिइएको भए पनि फसाइएको जिकिर गरे । घटना छानबिन समितिमा रहेका डीएसपी सुदीप पाठकले फसाएरै छाड्ने धम्की दिएका कारण सञ्जेलको हकमा प्रहरी अधिकारी नै पूर्वाग्राही ढंगबाट प्रस्तुत भएको जिकिर उनीहरूले गरे ।
प्रतिवादीका तर्फबाट मंगलबार नौ कानुन व्यवसायीले बहस गरे । उनीहरूले प्रतिवादीलाई साधारण तारेखमा राखेर मुद्दाको सुनुवाइ गर्नुपर्ने माग गरे । अधिवक्ता नारायणप्रसाद दाहालले टेकराज मल्ल ठकुरी र राजन थापा तथा अधिवक्ता जयबहादुर भुजेलले एलबी भनिने लालबहादुर मगरका पक्षमा बहस गरे । अधिवक्ता दाहालले अनुसन्धान गर्ने नाममा छानबिन समितिमा रहेकाहरूले कुटपिट गरेको र यातनासमेत दिएको भनेर बहस गरेपछि इजलासले थापाको घाउजाँच केस फारम गर्न पनि अनुमति दिएको छ । मंगलबारसम्ममा २५ कानुन व्यवसायीले बहस गरिसकेका छन् । प्रतिरक्षामा बहसका लागि ६६ कानुन व्यवसायीले १ सय १३ वटा वकालतनामा दर्ता गराएको अदालतका तहसिलदार अधिकृत केदार गौतमले बताए ।
प्रतिक्रिया दिनुहोस !
