कंगो : प्रजातान्त्रिक गणतन्त्र कंगोमा फेरि इबोला भाइरसको संक्रमण देखा परेको स्वास्थ्य अधिकारीले जनाएका छन् ।दश लाख जनसंख्या भएको उत्तरपश्चिमी शहर ब्यान्डाकामा उक्त संक्रमण देखिएको यहाँका स्वास्थ्यमन्त्रीले जानकारी दिएका छन् । इबोला संक्रमणका विरामी यहाँ पुनः देखा परेका हुन् । झण्डै १० लाख व्यक्तिको बसोवास रहेको उक्त शहरमा यो संक्रमण देखा परेकाले यसको प्रकोप बढ्न सक्ने त्रास बढेको जनाइएको छ ।
यसअघि यसै महिनाको शुरुमा ब्यान्डाका शहरभन्दा करिब १५० किलोमिटर टाढा अवस्थित ग्रामीण बस्तीमा इबोला संक्रमणका विरामी देखिएका थिए । यस संक्रमणमा परी करिब २३ जनाले ज्यान गुमाएका थिए । परीक्षणका लागि चार हजार इबोलाको खोप बुधबार मात्र कंगो पुर्याइएको विश्व स्वास्थ्य संगठनले जानकारी दिएको थियो ।
पश्चिम अफ्रिकामा सन् २०१४ मा इबोलाको महामारीको क्रममा उक्त खोपको परीक्षण सफल भएको विश्व स्वास्थ्य संगठनले थप जानकारी दिएको छ । कंगोमा यस प्रकार इबोलाको नयाँ संक्रमणबाट खराब अवस्था आउनसक्ने भन्दै विश्व स्वस्थ्य संगठनले चिन्ता प्रकट गरेको छ ।
यस संक्रमणको नियन्त्रणका लागि विश्व स्वस्थ्य संगठनले सहयोग गर्ने वाचा गरेको छ । त्यसबमोजिमका आठ हजार खोपमध्ये पहिलो किस्ताका चार हजार खोप बिहीबार त्यहाँ पुर्याइएको छ । इबोला संक्रमित र उनीहरूसँग सम्पर्कमा रहेका व्यक्तिलाई सकेसम्म चाँडो खोप लगाउने विश्व स्वास्थ्य संगठन र कंगोका अधिकारीले जानकारी दिएका छन् ।
सन् २०१४ देखि २०१६ सम्म पश्चिम अफ्रिकामा देखिएको इबोलाको भीषण महामारी कंगोमा हाल देखिएकाले परिस्थिति खतरापूर्ण पनि हुनसक्ने अधिकारीको भनाइ छ । पश्चिम अफ्रिकामा इबोला भाइरसका कारण करिब एघार हजारको ज्यान गएको थियो । यसको संक्रमण प्रकोप २८ हजार व्यक्तिमा देखिएको बताइएको थियो ।
प्रतिक्रिया दिनुहोस !
