साग खेलकुद : ट्रायथलनमा नेपाललाई २ स्वर्ण, ३ रजत र १ कास्य

पोखरा : १३ औं दक्षिण एसियाली खेलकुद (साग) अन्तर्गत पोखरामा सम्पन्न भएको ट्रायथलन खेलमा नेपालले २ स्वर्ण, ३ रजत र १ कास्य पदक प्राप्त गर्न सफल भएको छ । तीन दिनसम्म नेपाल, भारत र श्रीलंकाका २६ खेलाडी ५ स्वर्णका लागि प्रतिस्पर्धा गरेका थिए । नेपालले ट्रायथलन महिलातर्फको स्प्रिन्ट विधामा सोनी गुरुङ र दुवाथलन पुरुषतर्फको स्प्रिन्ट विधामा हिमाल टमटाले एक÷एक स्वर्ण नेपाललाई दिलाएका थिए ।

त्यसैगरि दुवाथलन पुरुषतर्फको स्प्रिन्ट विधामा लक्ष्मण मल्ल र सोही विधाको महिलातर्फ हुमी बुढा मगरले नेपाललाई रजत पदक दिलाएका हुन् । साथै सोनी गुरुङ, दिपेश चौधरी, केशरी थापा मगर र बसन्त थारुको टिमले मिक्स टिम रिले ट्रायथलनमा रजत पदक प्राप्त गरे।पुरुषतर्फको स्प्रिन्ट विधाको ट्रायथलनमा बसन्त थारुले नेपाललाई कास्य पदक दिलाए। यो सँगै नेपालले ट्रायथलनमा कुल ६ पदक प्राप्त गरेको छ ।

नेपालका लागि मुख्यप्रतिस्पर्धी देश भारतले २ स्वर्ण, २ रजत र १ कास्य गरि कुल ५ पदक हात पारेको छ । त्यसैगरि श्रीलंकाले १ स्वर्ण र ३ कास्य गरि कुल ४ पदकमा चित्त बुझाएको छ ।कुल ५ स्वर्णसहित १५ पदकका लागि सागअन्तरगतको ट्रायथलनमा तीन देशको सहभागिता रहेको थियो ।यस अघिको १२औं सागको ट्रायथलनमा १ रजतर १कास्य मात्र हात पारेको थियो । 

ट्रायथलनमा सहभागिता जनाई नेपाललाई पदक दिलाउने खेलाडीलाई नेपाल ओलम्पिक कमिटिका महासचिव तथा ट्रायथलन संघका अध्यक्ष निलेन्द्रराज श्रेष्ठले नगद पुरस्कार दिने घोषणा गरेका छन् ।उनले स्वर्ण पदक विजेतालाई नगद १ लाख, रजत पदक विजेतालाई ५० हजार र कास्य पदक विजेतालाई २५ हजार रुपैयाँ दिने घोषणा गरेका हुन् । त्यसैगरि गण्डकी प्रदेश सांसद दिपक कोईराला र दिलीप श्रेष्ठले संयुक्त रुपमा स्वर्ण पदक ल्याउनेलाई २५ हजार, रजत पदकका लागि १५ हजार र कास्यका लागि १० हजार रुपैयाँ दिने घोषणा गरेका छन् ।