गोरखा : बहुला कुकुरले टोकेर सिरानचोक गाउँपालिका २ उपल्लो पामका ४५ वर्षीय रामबहादुर गुरुङको मृत्यु भएपछि गाउँका ५० जनालाई रेबिजविरुद्धको खोप लगाइएको छ । गोरखा जिल्ला अस्पतालसँग समन्वय गरी गाउँपालिकाको स्वास्थ्य शाखाले घरघरै स्वास्थ्यकर्मी पठाएर रेबिजविरुद्धको सुइ लगाएको गाउँपालिकाका अध्यक्ष राजु गुरुङले जानकारी दिए ।
आशंकित ५० जनामध्ये १६ जनालाई पहिलो र दोस्रो चरणको खोप दिइएको र मंगलबार ३४ जनालाई पहिलो चरणको खोप दिइएको उनले बताए । १६ जनालाई गोरखा अस्पतालमै लगेर पहिलो चरणको खोप दिइएको थियो । तर दोस्रो चरणको सुई गाउँमै लगाइएको गाउँपालिकाका स्वास्थ्य शाखाका रामचन्द्र पाण्डेले जानकारी दिए । ३४ जनाका लागि भने पहिलो चरणको पनि घरघरमै गएर सुइ लगाइएको उनले बताए ।
माघ २ गते रेबिज लागेको कुकुरले टोकेका गुरुङमा रेबिजको लक्षण देखिएको र फागुन १३ गते मृत्यु भएपछि गाउँमा रेबिज संक्रमणको त्रास फैलिएको गाउँपालिकाका अध्यक्ष गुरुङले बताए ।
गाउँपालिकाको स्वास्थ्य शाखाबाट खटिएको टोलीले सोधपुछ गर्दा रेबिजको लक्षणसँग मेल खाएको, माघ १० गते ८३ वर्षीय कलाबती गुरुङ र १६ गते ६६ वर्षका हर्कबहादुर गुरुङलाई पनि कुकुरले टोकेको गाउँपालिका स्वास्थ्य शाखाका प्रमुख टुकमान श्रेष्ठले बताए ।
रेबिज लागेको जनावरले टोकेको १ देखि तीन महिनामा रेबिज लक्षण मानिस तथा जनावरमा देखिन्छ । लक्षण देखिएको एक हप्तामा मृत्यु हुने खतरा रहने भएकाले स्थानीयमा त्रास छाएको उनले बताए । सो त्रास कम गर्न गाउँपालिका स्वास्थ्य शाखा र स्थानीय स्वास्थ्य चौकीका स्वास्थ्यकर्मीले रेबिजको लक्षण, सर्ने अवस्था, ध्यान दिनुपर्ने उपाएका बारे पनि घरघरमा पुगेर जानकारी गराएको स्वास्थ्यकर्मी रामचन्द्र पाण्डेले बताए ।
प्रतिक्रिया दिनुहोस !
