ओखलढुंगा : मानेभञ्ज्याङ गाउँपालिका–९ सिम्पानीका पाँच जना युवाले विदेशबाट फर्किंएर गाउँमै सामूहिक तरकारी खेती सुरु गरेका छन् । १० वर्षसम्म विदेशमा श्रम गरेर स्वदेश फर्किएका युवाको अगुवाईमा गाउँमै व्यावसायिक कृषि पेसा सुरु भएको छ ।
विदेशमा गरेको श्रम गाउँमै गर्न सके राम्रो आम्दानी गर्ने सकिने भएकाले गाउँ फर्किंएर १६ रोपनी जग्गा लिजमा लिइ व्यावसायिक रूपमा सामूहिक रूपमा तरकारी खेती थालिएको रामबहादुर बरालले बताए । बरालसँग भीमबहादुर मगर, चेतबहादुर मगर, रेवत मगर र टेकबहादुर मगरले साझेदारी गरेका छन् । चेतबहादुर मगर विदेशमा काम अनुसारको दाम नपाएपछि भागेर घर फर्किएका थिए । रामबहादुर र चेतबहादुरको सामूहिक खेती गर्ने अभियानमा छिमेकी भीमबहादुर, रेवत र टेकबहादुर मगरले साथ दिएपछि गाउँपालिकामै पहिलो पटक सामूहिक खेती सुरु भएको छ ।
‘१० वर्षसम्म विदेशमा बगाएको पसिना यही माटोमा बगाएको भए राम्रै आम्दानी हुने थियो’, बरालले भने, ‘तीन वर्ष मलेसिया र सात वर्ष साउदी बसेर पसिना बगाइयो, गाउँमै श्रम गर्ने सोचेर फर्के’, अन्नपूर्णसँग उनले भने,‘मेहनत गरे कृषिमै पैसा छ, टिप्न मात्र नजानेको हो ।’ उनले बिदेसिएर दुःख नपाउन युवालाई सुझाव दिए । उनीहरूले दुईवटा प्लास्टिकका ग्रिन हाउसमा टमाटर उत्पादन थालेका छन् । टमाटरसहित रायो, धनिया, मुला, गाजरजस्ता तरकारी पनि सँगै उत्पादन गरेका छन् ।
अर्का युवा चेतबहादुर आलेले विदेशको दुःख र श्रम यही गरे पैसा कमाउन विदेशै जान नपर्ने बताए । ‘हामी अहिले तरकारीसहित सामूहिक बंगुर पाल्ने योजनामा छौं’, चेतबहादुरले भने, ‘व्यावसायिक बन्ने हो भने कृषिमा निकै सम्भावना छ ।’ उनीहरूले तरकारी उत्पादनपछि बोकेर मानेभञ्ज्याङ र केत्तुकेसम्म लगेर बेच्छन् । अहिले गाउँपालिकाको पशु शाखाबाट ४० वटा बंगुरका पाठा पाएपछि उनीहरू उत्साहित छन् । भविष्यमा सिम्पानी गाउँलाई तरकारीको पकेट क्षेत्र बनाउन एकजुट भएको उनीहरूले बताए ।
उनीहरूको अभियानमा वडा कार्यालय र संघसंस्थाले पनि साथ दिएका छन् । दुई लाख रुपैयाँमा थालेको सामूहिक अभियानमा ५० हजार अनुदान दिएको छ । प्रयास नेपाल नामक संस्थाले तीनवटा थोपा सिँचाइ सेट र टनेल सहयोग गरेको छ । पाँच युवाको सामूहिक खेती देखेर छिमेकीले पनि तरकारी खेती थालेको स्थानीय दिपक मगरले बताए ।
प्रतिक्रिया दिनुहोस !
