कावासोतीमा सहकारी बैंकको ४४ औं शाखा उद्घाटन : पहिलो दिनमै १२ करोड निक्षेप संकलन
कावासोती (नवलपुर) : राष्ट्रिय सहकारी महासंघका अध्यक्ष केशव बडालले सहकारीको जागरण अभियान प्रभावकारी बन्दै गएकोले अब सहकारी क्षेत्रलाई व्यावसायिकतातर्फ केन्द्रीत गर्नु पर्नेमा जोड दिएका छन्। सहकारी क्षेत्रको एक मात्र बैंक राष्ट्रिय सहकारी बैंक लिमिटेडको ४४ औं शाखाको नलपुरको कावासोतीमा शनिबार उद्घाटन गर्दै उनले सहकारी अब व्यवसायिक बन्नुपर्ने बताए। सहकारीका बारेमा आम जनतालाई जानकारी गराउने, विपन्न वर्गका जनतालाई सहकारी अभियानमा सहभागी गराउने तथा सहकारीमार्फत आयआर्जन गर्ने काममा सहकारीहरु अब्बल बनिसकेकाले अबको सम्पूर्ण ध्यान व्यावसायिकतातर्फ केन्द्रीत गर्नु पर्नेमा उनको जोड थियो।
‘सहकारी क्षेत्रमा रहेको श्रम, सीप र पूँजीलाई व्यावसायिक क्षेत्रमा केन्द्रीत गर्न सक्यौ भने राज्यले अंगिकार गरेको तीन खम्बे अर्थनीति अनुसार समाजवाद उन्मुख अर्थतन्त्र निर्माणमा सहजता आउँछ’ उनले भने। ‘सहकारीका सदस्यहरुले ब्याज कति आयो, नाफा कति भयो भन्ने र सहकारीका सञ्चालकहरुले सदस्यहरुलाई कसरी नगदमा नाफा दिन सकिन्छ भनेर होडवाजी गर्ने हो भने सहकारीको मुल लक्ष्य प्राप्ति हुन सक्दैन, अध्यक्ष बडालले भने–सहकारीको लक्ष्य र राज्यको उद्देश्य पूरा गर्नका लागि सहकारीहरुलाई व्यावसायिक क्षेत्रमा केन्द्रीत गर्नै पर्छ।’
राष्ट्रिय सहकारी बैंकले देशभरका सबै विषयका सहकारीहरुलाई वित्तीय लगायत शिक्षा तालिम र प्रविधिहरुका बारेमा सहयोग गर्ने भएकाले समन्वय गरेर व्यावसायिक योजनाका साथ अगाडि बढ्न उनले सबै सहकारीकर्मीहरुलाई आव्हान गरे।
कार्यक्रममा नेफ्स्कुनका सञ्चालक शान्ति अधिकारी र जिल्ला बचत तथा ऋण सहकारी संघ नवलपरासीका अध्यक्ष माधवप्रसाद गौतमले सहकारी बैंकको कावासोती शाखाबाट अधिक भन्दा अधिक सेवा सुविधा लिनका लागि सहकारी संघ संस्थाहरुलाई आव्हान गरे।
कार्यक्रममा बैंकको अवस्थाका बारेमा बैंकका प्रबन्ध सञ्चालक केबी उप्रेती र लेखा समितिका संयोजक कुलचन्द्र अधिकारीले जानकारी गराए।
जिल्ला सहकारी संघ नवलपरासीका सचिव तिलक पराजुलीले जिल्लाको सहकारीको अवस्था, नवलपुर क्षेत्रका सहकारीको वित्तीय तथा अन्य सेवा लगायतका विषयमा आफ्ना धारणा राखेका थिए। कार्यक्रम बैंकका अध्यक्ष रमेशप्रसाद पोखरेलको अध्यक्षता, सञ्चालक रामबहादुर जिसीको सञ्चालन र कावासोती शाखाका प्रमुख अरुणा अधिकारीको स्वागतमा सम्पन्न भएको थियो।
यसैबीच शाखा उद्घाटनकै दिन सुस्ता पूर्वका सहकारी संघ संस्थाहरुले १२ करोड भन्दा बढी निक्षेप संकलन गरेको शाखाका कर्मचारी नारायण ढकालले जानकारी दिए। नवलपुर क्षेत्रमा करिव २ सय ५० सहकारी संघ संस्था रहेका छन्, ति सहकारीले वार्षिक १० अर्ब भन्दा बढीको कारोबार गर्दै आएका छन्। सबै सहकारीले तरलताको रकम मात्रै राष्ट्रिय सहकारी बैंकमा कारोबार गरेमा वार्षिक २ अर्व भन्दा बढीको कारोबार कावासोती शाखाबाट हुने जिल्ला सहकारी संघ नवलपरासीका सचिव तिलक पराजुलीले बताए।
देशभरका १० हजार बढी सहकारी संघ संस्थाहरु सदस्य रहेको बैकमा १ अर्ब शेयर रकम, १४ अर्ब निक्षेप र १२ अर्ब कर्जा लगानी र १८ अर्बको कुल कारोबार गरेको बैंकमा हाल ३ सय जना कर्मचारी कार्यरत रहेका छन्।