कुस्मा : धौलागिरिका चार जिल्लालाई संघीय तथा प्रदेश राजधानीसँग जोड्ने एक मात्र सडक स्तरोन्नतिका लागि बन्द गरिँदा यात्रु समस्यामा परेका छन् । मध्यपहाडी लोकमार्गको पर्वत खण्ड र कास्की खण्डमा फरक फरक समयमा दैनिक ७ घण्टा बन्द गरिँदा यात्रु सास्ती खेप्न बाध्य छन् । पर्वतको कुस्मा नगरपालिकामा पर्ने चुवाको भीर र मोदी गाउँपालिकामा पर्ने डिमुवा माहुरीभीरमा सडक फराकिलो बनाउने क्रममा सडक बन्द गरिएको छ ।
कुस्मा नगरपालिकाको खरेहा खोलादेखि मोदी गाउँपालिकाको अँधेरीखोलासम्म बिहान १० बजेदेखि दिउँसो १२ बजेसम्म सडक बन्द भइरहेको छ भने दिउँसो १ बजेदेखि ४ बजेसम्म पनि सडक बन्द गरिएको छ । साँझ ६ बजेदेखि राति ८ बजेसम्म पनि सडक बन्द गरेर निर्माणको कामलाई निरन्तरता दिएको छ ।
निर्माण कम्पनी लामा कन्ट्रक्सन कम्पनीका प्रोजेक्ट म्यानेजर गोविन्द भुसालले माहुरीभरका २ स्थानबाट सडक फराकिलो बनाउने काम भइरहेको बताए ।
अझै थप एक्स्काभेटर परिचालन गरी दुवै ठाउँमा ३÷३ ठाउँबाट सडक फराकिलो बनाउने काम तीव्र रूपमा रहेको भुसालले बताए । ‘वर्षायाममा यात्रुको चाप कम हुने र सवारीसाधन पनि पातलो चल्ने कारणले सात घण्टा सडक बन्द गरेर काम गर्ने निर्णय गरिएको हो’, प्रोजेक्ट म्यानेजर भुसालले भने ‘दुवै कठिन भीरमा २ महिनाभित्रैमा काम सक्ने लक्ष्य राखेर काम गर्दै छौं ।’
आयोजनाको पर्वतको प्रवेशद्वारदेखि मालढुंगासम्मको २३ किलोमिटर स्तरोन्नतिको काम लामा कन्ट्रक्सन प्रालिले जिम्मा लिएको छ । कम्पनीले ८३ करोड ९८ लाख रुपैयाँमा पर्वत खण्ड स्तरोन्नतिको कामको ठेक्का लिएको छ । उसले अहिलेसम्म १२ प्रतिशत काम सकिएको जनाएको छ ।
यात्रुलाई पनि लगातार बन्द गर्दा समस्या पर्ने भएकाले सडक पनि निर्माण हुने र यात्रुलाई समस्या नहुने गरी बन्द गर्ने निर्णय भएको प्रमुख जिल्ला गुरुदत्त ढकालले बताए । चुवा र माहुरी भीरमा पनि सकेसम्म वैकल्पिक सडक बनाएर आवागमन सहज बनाउने प्रयास भइरहेको पनि उनले जानकारी दिए ।
मध्यपहाडी लोकमार्गमा पर्ने कास्की खण्डमा पनि सडक बन्द गर्दा झनै समस्या आएको छ । कास्की जिल्लाको अन्नपूर्ण गाउँपालिकाको गिरिचोक नजिक सडक बन्द गर्दा यात्रु दोहोरो मारमा परेका छन् । पर्वत खण्डमा बन्द खुलेर पुग्ने सवारी साधनका कारण उही समय तालिकामा सडक बन्द गर्न समस्या भएको निर्माण कम्पनी एपेक्स कन्ट्रक्सन कम्पनीका प्रोजेक्ट म्यानेजर काशीराज बोहराले जानकारी दिए ।
प्रतिक्रिया दिनुहोस !
