पशुपतिनगर : इटहरीका इक्वल अहमद मंगलबार सूर्योदय नगरपालिकामा पर्ने नेपाल–भारत सीमाको बजार पशुपतिनगर पुगे । उनले पशुपतिनगरको चिनो भन्दै ज्याकेट किन्न खोजे । पसलमा पुगेर ज्याकेटको भाउ सोधे । व्यापारीले सात सय रुपैयाँ मूल्य पर्ने बताए ।
अहमदले सात सय रुपैयाँ दिन खोज्दा पसलेले भने, ‘सात सय त भारुमा हो ।’
पशुपतिनगरमा नेपाली र भारतीय मुद्रामा धेरै नेपाली झुक्किने गरेका छन् । भारतीय व्यपारीहरू बढी आउने नेपाली बजार पशुपतिनगरमा भारतीय व्यापारीहरू भारतीय रुपैयाँमा सामानको मूल्य बताउँछन् । तर नेपाली रुपैयाँ बोकेर जाने नेपालीचाहिँ नेपाली मूल्य बुझ्छन् ।
स्थानीय मिलन क्षत्रीका अनुसार पशुपतिनगर बजार भारतीय व्यापारीको भरमा चलेको छ । दार्जिलिङले पशुपतिनगरलाई पर्यटकीय प्वाइन्टका रूपमा उल्लेख गरेकोले पर्यटकलाई एक घण्टाका लागि त्यहाँ घुम्ने अवसर दिएको छ । क्षत्रीले भने, ‘त्यही समयमा भारतीय पर्यटकहरू हतारमा सामान किन्न आउँछन् ।’
छोटो समयमा सामान किनबेच गर्नुपर्ने बाध्यताका कारण भारुमै कारोबार गर्न त्यहाँका व्यापारीहरू बाध्य छन् । भारतीय व्यापारीलाई लक्ष्य गरेर हुने कारोबारमा नेपाली पर्यटकहरू पनि पर्ने गरेको झापाकी रोजिना गौतमले बताइन् । उनले हरेक कुरा भारुमा कारोबार गर्ने गरेको पाएको बताइन् ।
उद्योग वाणिज्य संघ सूर्योदय नगरपालिकाका अध्यक्ष प्रमोद राईले पशुपतिनगरमा सटही काउन्टर नभएकाले भारु साटेर कारोबार गर्न नसकेको बताए । उनले सटही काउन्टरको आवश्यकतामा जोड दिए ।
पशुपतिनगरमा चीनसहितको विभिन्न देशका सामग्रीहरू पाइन्छन् । सीमावर्ती क्षेत्रका नेपालीहरू पनि लत्ताकपडा, घरायसी प्रयोगका सामान आदि खरिदका लागि पुग्ने गर्छन् । चिनीयाँ सामानहरू पनि पशुपतिनगरमा विशेष कारोबार गरिन्छ ।
सूर्योदय नगरपालिकाका मेयर रणबहादुर राईले व्यापारीलाई नेपाली र भारतीय मुद्रा दुवैमा सामानको भाउ बताउन अनुरोध गरेको बताए । उनले नेपाली मुद्रामा कारोबार गराउन सटही काउन्टरका लागि पहल गर्ने बताए ।
यता इलामका प्रमुख जिल्ला अधिकारी श्रमणकुमार तिमल्सिनाले धेरै नेपाली ग्राहकको गुनासो आएकाले बैंकहरूसँग बुझेर सटही काउन्टर खोल्न पहल गर्ने बताए ।
प्रतिक्रिया दिनुहोस !
