काठमाडौं : नेपाली राष्ट्रिय टोलीका युवा स्पिनर सन्दीप लामिछानेले क्यारेबियन प्रिमियर लिग (सीपीएल)मा आफ्नो उत्कृष्ट प्रदर्शन जारी राखेका छन् । लिगअन्तर्गत बिहीबार भएको खेलमा सन्दीपले दुई विकेट लिए । सन्दीपले २१ रन खर्चिएर दुई विकेट लिएका थिए । सन्दीप लयमा देखिए पनि उनको टोली सेन्ट किट्स एन्ड नेभिस प्याट्रियट्स भने जमैका तल्वाहाससँग ४७ रनले पराजित भयो ।
जमैकाले दिएको एक सय ७९ रनको लक्ष्यसहित जवाफी ब्याटिङमा उत्रिएको प्याट्रियट्स निर्धारित २० ओभरमा नौ विकेटको क्षतिमा एक सय ३१ रनमा समेटिएको थियो । प्याट्रियट्सका कप्तान क्रिस गेलले २४ र मोहमद महमुदउल्लाहले २२ रन जोडेका थिए । यसअघि टस हारेर पहिले ब्याटिङ गरेको जमैकाले २० ओभरमा चार विकेटको क्षतिमा एक सय ७८ रन बनाएको थियो ।
जमैकाका लागि रोस टेलरले ५१, केन्नर लेविस ४९ र ग्लेन फिलिप्सले ४१ रन बनाए । प्याट्रियट्सका सन्दीपले दुई विकेट लिए । लिगमा तीन खेल खेलेको प्याट्रियट्सका लागि सन्दीपले पाँच विकेट लिइसकेका छन् । लिगमा दुई अंक बनाएको प्याट्रियट्स तालिकाको पाँचौं स्थानमा छ ।
शीर्ष स्थानमा रहेको जमैकाको ६ अंक छ । सन्दीप हालै नेदरल्यान्ड्समा एकदिवसीय खेल खेलेर उतैबाट क्यारेबियन प्रिमियर लिग (सीपीएल) खेल्न गएका थिए । इन्डियन प्रिमियर लिग (आईपीएल) खेल्ने पहिलो नेपाली खेलाडी बनेको सन्दीपले आईपीएलमा पनि तीन खेलमा पाँच विकेट लिएका थिए । सन्दीपले अघिल्लो महिना ग्लोबल टीट्वेन्टी क्यानाडा लिगमा मोन्ट्रियल टाइगर्सबाट ६ खेलमा ८ विकेट लिएका थिए । सन्दीपले नेपालबाट २२ लिस्ट ए खेलमा ४३ विकेट लिइसकेका छन् ।
प्रतिक्रिया दिनुहोस !
