काठमााडौँः इङ्लिस प्रिमियर लिग अन्तरगत आइतवार राति भएको खेलमा उपाधि दावेदार मानिएको म्यानचेस्टर युनाइटेड ब्राइटन एन्ड होभ अल्बिओनसँग लज्जास्पद हार भोग्न बाध्य भएको छ ।
सहज जित दर्ता गराउने लक्ष्यका साथ मैदानमा उत्रिएको युनाइटेडलाई ब्राइटनले ३–२ को नमिठो हार चखाएको हो । ब्राइटनको जितमा दुई मिनेटको अन्तरमा मुर्रे र ड्युफेले गोल गरे । मुर्रेले २५ औँ मिनेटमा अग्रता दिएपछि ड्युफेले २७ औँ मिनेटमा गोल गर्दै अग्रता २–० को बनाए ।
त्यसपछि खेलको ३४ औँ मिनेटमा युनाइटेडका लागि लुकाकुले एक गोल फर्काए । तर खेलको ४४ औँ मिनेटमा ग्रोबले पेनाल्टीबाट गोल गरेपछि ब्राइटनले अग्रतालाई ३–१ मा पुर्याउन सफल भयो ।
दोस्रो हाफमा युनाइटेडले खेलमा फर्किन गरेको कोशिसलाई ब्राइटनले निरन्तर असफल बनाइदियो । खेलमा अतिरिक्त समयको पाँचौ मिनेटमा पोग्बाले पेनाल्टीबाट गोल गरेपनि युनाइटेडलाई जित निकाल्न धेरै ढिला भइसकेको थियो ।
पहिलो खेलमा लेस्टर सिटीलाई हराएको युनाइटेड तुलनात्मकरुपमा कम्जोर ब्राइटनसँग पराजित भएको दिन उसको सहरी प्रतिद्वन्द्वी म्यानचेस्टर सिटीले भने हडर्सफिल्डलाई ६–१ को हार चखाएको छ ।
प्रतिक्रिया दिनुहोस !
