लन्डन : इङ्लिस प्रिमियर लिगमा लिभरपुलले कठिन जित हात पारेको छ । घरेलु मैदानमा शनिबार राति खेलिएको खेलमा लिभरपुलले ब्राइटन एन्ड होभ एल्बियोनलाई १-० गोलले हरायो । लिभरपुलको जितमा मोहमद सलाहले २३औं मिनेटमा गरेको गोल नै निर्णायक बनेको थियो ।
लिगमा लगातार तेस्रो जित हात पारेको लिभरपुलले नौ अंक बनाएको छ । ब्राइटनको समान खेलबाट तीन अंक छ । अर्को खेलमा लेस्टर सिटीले साउथह्यामटोनलाई ३-१ गोलले हरायो । साउथह्यामटोनको घरेलु मैदानमा भएको खेलमा सुरुवाती अग्रता साउथह्यामटोनले लिएको थियो । साउथह्यामटनका लागि रायन बर्तरान्डले ५२औं मिनेटमा गोल गरे । साउथह्यामटनको गोलपछि आक्रामक देखिएको लेस्टर सिटीले ५६औं मिनेटमा बराबरी गोल फर्काएको थियो ।
लेस्टरका डिमाराई ग्रेले गोल गरे । ७७औं मिनेटमा पिर्रे होजबेराग दोहोरो पहेँलो (रातो) कार्ड पाउँदै बाहिरिएपछि साउथह्यामटन १० खेलाडीमा समेटिएको थियो । त्यसपछि लेस्टरले ९०औं मिनेटमा निर्णायक गोल गरेको थियो । लेस्टरका हेरी म्याग्वीरेले दोस्रो गोल गरेका थिए । जितसँगै लेस्टरले ६ अंक बनाएको छ । साउथह्यामटोनको एक अंक मात्र छ । यसैगरी अन्य खेलमा आर्सनलले वेस्टहाम युनाइटेडलाई ३-१ गोलले हरायो । कार्डिफ सिटी र हडल्स फिल्ड टाउनले गोलरहित बराबरी खेल्दै अंक बाँडेका छन् ।
प्रतिक्रिया दिनुहोस !
