पोखरा : पोखरा जुलोजिकल पार्कमा शनिबारदेखि मृगस्थली सञ्चालनमा आएको छ । यो पार्क घाइते र अवैध रुपमा पालिएका जंगली जनावरलाई उद्धार, उपचार र पालनपोषण गरी फेरि जंगलमै फर्काउने उद्देश्यले सञ्चालनमा ल्याइएको हो । पोखरा महानगरको आर्थिक सहयोग र स्थानीय जनसहमागितामा १७ लाख रुपैयाँको लागतमा पार्कभित्र मृगस्थली (मृगलाई राख्ने छुट्टै ठाउँ) निर्माण गरिएको हो ।
पोखरा महानगरका मेयर मानबहादुर जिसीले उद्धार गरी ल्याइएका मृग र त्यहाँ जन्मेका २ महिनाको मृगको बच्चालाई छाडेर मृगस्थली उद्घाटन गरेका हुन् । मेयर जिसीले विपतमा परेका, असहाय, टुहुरा जंगली जनावरको आ श्रयस्थलका लागि जुलोजिकल पार्क सञ्चालनमा आउनु राम्रो सुरुवात भएको बताए । पार्कलाई अन्तर्राष्ट्रियस्तरको सेवा सुविधा र जनावरमैत्री बनाउन डीपीआर तयार गरेरअघि बढ्नुपर्ने खाँचो औंल्याए ।
गण्डकी प्रदेशका वन, पर्यटन, उद्योग तथा वातावरण मन्त्रालयका सचिव डा. बुद्धिसागर पौडेलले जुलोजिकल पार्कलाई अन्तर्राष्ट्रियस्तरको बनाउन सघाउने गरी प्रदेश सरकारले १ करोड ५० लाख रुपैयाँ डीपीआर तयार पार्न छुट्याएको जानकारी दिए । अनाथ, घाइते, अवैध रुपमा पालिएका जंगली जनावरको उद्धार गरी उपचार, पालन पोषण र फेरि जंगलमा छाडिने उनले बताए । त्यसका लागि वैज्ञानिक रुपमा वन्यजन्तु उद्धार गर्न सघाउने गरी प्रदेश सरकारले ५० हजार रुपैयाँ पनि छुट्याएको सचिव पौडेलले बताए ।
२०७२ सालदेखि घाइते जंगली जनावरको उद्धार, उपचार हुँदै व्यवस्थित जुलोजिकल पार्कको रुपमा विकास हुने क्रम अघि बढ्दै गएको जुलोजिकल पार्क सञ्चालक समितिका अध्यक्ष हिमालयन बख्रेलले जानकारी दिए । पार्क निर्माणमा युनाइटेड क्लब पोखराले ४५ लाख रुपैयाँ लगानी गरेको छ । क्लबले महोत्सव सञ्चालन गरी जुलोजिकल पार्क निर्माण गर्न पहल गरेको युनाइटेड क्लबका पूर्वअध्यक्ष एवं समितिका अध्यक्ष बख्रेलले बताए ।
पोखरा महानगरले २३ लाख र साविक जिल्ला वन कार्यालय कास्कीको २० लाख रुपैयाँ सहयोगमा घाइते जंगली जनावर राख्न केही पूर्वाधार निर्माण भएको समितिका महासचिव दामोदरभक्त थापाले जानकारी दिए । पार्कमा उद्धार गरी ल्याइएका ८ वटा रतुवा, जरायो १, निलगाई, स्याल, गिद्ध, बाँदर, हुचिल, चिल, वनबिरालोलगायत जंगली जनावर छन् । मृगस्थली निर्माणमा पोखरा महानगरको १३ लाख ६० हजार रुपैयाँ र जनसहभागिताबाट ३ लाख ४० लाख गरी १७ लाख रुपैयाँको लगानीमा निर्माण भएको उपभोक्ता समितिका अध्यक्ष पुरुषोतम अधिकारीले बताए ।
कार्यक्रमा डिभिजन वन कार्यालय कास्कीका डिभिजन अधिकृत केदार बराल, संरक्षण कर्मी राजु आचार्यले जुलोजिकल पार्कमा उद्धार गरी ल्याइएका जंगली जनावरको उचित उपचार, आहारबिहार र पार्कको व्यवस्थापन अन्तर्राष्ट्रिय मापदण्ड अनुसार हुनुपर्ने बताए । पोखरा महानगर ३०, ३१ र ३२ वडाका पचभैया सामुदायिक वन, चैनपुर सामुदायिक वन र चायपानी चिसाकुना सामुदायिक वन भित्रको १ सय ४० हेक्टरमा जुलोजिकल पार्क फैलिएको छ ।
प्रतिक्रिया दिनुहोस !
