काठमाडौं : साफ च्याम्पियनसिप फुटबलको उपाधि जित्ने लक्ष्य राखेको नेपाललाई पहिलो खेलमै पाकिस्तानको झट्का लागेको छ । बंगलादेशमा मंगलबारदेखि सुरु भएको च्याम्पियनसिपको पहिलो खेलमा नेपाल पाकिस्तानसँग २-१ गोलले पराजित भयो । समूहमा कमजोर ठानेको पाकिस्तानसँग नेपालले अतिरिक्त समयको अन्तिम ३० सेकेन्ड सम्हालिन नसक्दा हार खेपेको थियो ।
बंगबन्धु स्टेडियममा खेलिएको खेलमा नेपालले पहिलो हाफमा दबाब खेपेको थियो । ३६औं मिनेटमा पाकिस्तानले पेनाल्टीमार्फत सुरुआती गोल गरेको थियो । पाकिस्तानका लागि हसन नवेद बसिरले पेनाल्टीको सदुपयोग गरेका थिए । डिबक्सभित्र नेपालका कप्तान विराज महर्जनले पाकिस्तानका मोहमद रियाजलाई अनावश्यक फल खेलेपछि पाकिस्तानले पेनाल्टीको मौका पाएको थियो ।
पहिलो हाफमा १-० गोलले पछि परेको नेपालले दोस्रो हाफमा खेलमा फर्किने प्रयास गरेको थियो । दोस्रो हाफमा बल नियन्त्रण र आपसी तालमेल मिलाएको नेपालले ८२औं मिनेटमा बराबरी गोल फर्कायो । नेपालका लागि विमल घर्तीमगरले गोल गरे । विमलले डिबक्स नजिक नीराजन खड्काले दिएको पासमा ‘वानटच’ जाली चुमाएका थिए । विमलको गोलपछि थप आक्रामक देखिएको नेपालले ८९औं मिनेटमा अर्को सुनौलो गोलको अवसर गुमाएको थियो । कर्नरबाट प्राप्त बलमा नेपालका सुमन अर्यालको उत्कृष्ट हेड प्रहारलाई पाकिस्तानका गोलरक्षक युसुफ इजाज बटले विफल पारेका थिए ।
त्यसपछि थपिएको पाँच मिनेटमा पनि नेपालले औसत खेल खेल्यो । तर, अतिरिक्त समयको अन्तिम मिनेटमा पाकिस्तानले काउन्टर प्रहारका निर्णायक गोल गरेको थियो । नेपालका रक्षकको तालमेल नमिलेको फाइदा उठाउँदै पाकिस्तानका मोहम्मद अलीले खेल सकिन ३० सेकेन्ड बाँकी छँदा गोल गरेका थिए ।
खेलपछि नेपालका प्रशिक्षक बालगोपाल महर्जनले खेलाडीले राम्रो खेले पनि अन्तिममा सम्हालिन नसक्दा हार खेपेको बताए । ‘अन्तिम रक्षकबाट केही गल्ती भयो । खेलमा गल्ती हुन्छ । आगामी खेलमा सुधार गर्दै जानेछौं । दुई खेलमा जित निकाल्दै दोस्रो चरणमा पुग्न सकिन्छ । पहिलो हाफको तुलनामा दोस्रो हाफमा राम्रो थियो । दोस्रो हाफको खेललाई निरन्तरता दिन सके बाँकी खेल जित्न सक्छौं’, महर्जनले भने । उनले डेब्यु खेलमा सुमन अर्यालले उत्कृष्ट प्रदर्शन गरेको पनि बताए ।
यसैगरी पाकिस्तानका प्रशिक्षक जोस नोगुइराले नेपालले राम्रो खेलेको बताए । ‘खेल नेपालको राम्रो थियो । गोलमा हामी माथि भयौं । आगामी खेलमा थप सुधार गर्दै अगाडि बढ्न चाहन्छौं । पाकिस्तानको खेल पछिल्लो समय राम्रो हुँदै गएको छ’, जोसेले भने ।
च्याम्पियनसिपमा नेपाल समूह ‘ए’मा छ । नेपालको समूहमा आयोजक बंगलादेश, पाकिस्तान र भुटान छन् । बंगलादेशबाहेक तीनवटै टोलीले अहिलेसम्म च्याम्पियनसिप जित्न सकेका छैनन् । नेपालले समूह चरणको दोस्रो खेल भदौ २१ गते भुटान र अन्तिम खेल २३ गते बंगलादेशसँग खेल्नेछ । समूहका शीर्ष दुई टोली सेमिफाइनलमा पुग्नेछन् । समूह ‘बी’मा साविक विजेता भारत, माल्दिभ्स र श्रीलंका छन् । भारत च्याम्पियनसिपको सर्वाधिक सफल टोली हो । उसले सातपटक उपाधि उचालेको छ ।
सुमनको डेब्यु
नेपालका रक्षक सुमन अर्यालले साफ च्याम्पियनसिपमा पाकिस्तानविरुद्धको खेलबाट राष्ट्रिय टोलीमा डेब्यु गरेका छन् । सुमनले त्रिभुवन आर्मी क्लबबाट फुटबल खेल्दै आएका छन् । टोलीका नियमित रक्षक रविन श्रेष्ठ चोटका कारण बाहिरिएपछि सुमनले स्थान पाएका हुन् । सुमनले नेपालको उमेर समूहमा यू-१४, यू-१६, यू-१९ र यू-२३ टोलीबाट पनि खेलिसकेका छन् । नेपालले २०७४ सालमा भएको साफ यू-१९ च्याम्पियनसिपको उपाधि जित्दा टोलीमा सुमनको योगदान महत्वपूर्ण थियो ।
प्रतिक्रिया दिनुहोस !
