युएस ओपनः सेरेनालाई हराउँदै जापानकी २० वर्षीया नाओमीले रचिन् इतिहास
भदौ २४, २०७५ आइतबार २१:२७:०
न्यूयोर्क : युएस ओपनको महिलातर्फको एकल प्रतिस्पर्धामा पहिलो पटक जापानी खेलाडी नाओमी ओशाकाले सेरेना विलियम्सलाई पराजित गरी उपाधि हात पारेकी छिन् ।
अमेरिकाकी विख्यात टेनिस खेलाडी सेरेना विलियम्सलाई माथ खुवाउँदै ओशाकाले उपाधि जितेकी हुन् । सेरेनाले निर्णायकमाथि सेरेनाको अभद्र व्यहार र गालीगलौज गरेपछि कारण खल्लो भएको खेलमा २० वर्षीया नाओमीले ६-२ र ६-४ को सोझो सेटमा सेरेनालाई पराजित गरेकी थिइन् ।
खेलका मुख्य निर्णायक कार्लोस रामोसमाथि गरेको गालीगलौजका कारण सेरेनामाथि जरिवाना समेत गरिएको थियो । दोस्रो सेटबाट सुरु भएको त्यो विवादका कारण सेरेनाले कोर्टमै र्याकेट फाल्नुका साथै तोडफोड गरेकी थिइन् । यही सेटमा नाओमीले ५-३ को अग्रता समेत लिएकी थिइन् ।
खेलपछि प्रतिक्रिया दिँदै ओशाकाले सेरेनाको चर्को आवाजले आर्थर एस रंगशाला नै गुञ्जायमान भए पनि आफूले खेललाई सामान्य ढङ्गबाट लिएको बताइन् ।
'मलाई अतिरिक्त प्वाइन्ट दिइएको थियो, र यसबाट म केही असमन्जसमा परेकी थिएँ', उनले भनिन्, 'तर मैले खेलमै आफूलाई केन्द्रित गरिरहेको थिएँ । सेरेना कुनै पनि समयमा खेलमा फर्कन सक्ने सम्भावना मैले देखिरहेको थिएँ ।'
एक छोरीकी आमा सेरेनाले २४औं ग्रान्डस्लाम प्रतियोगिता जित्ने अपेक्षा राखेकी थिइन् । नाओमीलाई युएस ओपनको कप दिँदा दर्शक दिर्घाबाट असन्तोष समेत प्रकट भएको थियो ।
तर सेरेनाले आफ्ना समर्थकलाई शान्त पार्दै भनिन् , 'होइन, नाओमीले ज्यादै राम्रो खेलिन् । यो उनको पहिलो ग्रान्डस्लाम हो । हामी सबैले उनलाई सम्मान गर्नु पर्दछ ।'
सेरेनालाई आदर्श महिला मान्दै आएकी नाओमीले भनिन्, 'युएस ओपनमा सेरेनासँग खेल्ने मेरो पनि सपना थियो । मैले आफूलाई आज अत्यन्त भाग्यमानी सम्झेकी छु ।' मार्चमै भएको इन्डियन्स वेल्स प्रतियोगितामा समेत नाओमीले सेरेनालाई पराजित गरेकी थिइन् ।
प्रतिक्रिया दिनुहोस !
