आबुधावी : अफगानिस्तानका स्टार क्रिकेटर रसिद खानको २०औं जन्मिदिन यति सम्झन योग्य रह्यो की यस्तो जन्मदिन जो कोहीको हुन असम्भव छ । यूएइमा जारी एसियन क्रिकेट काउन्सिल (एसीसी) एसिया कप क्रिकेट प्रतियोगितामा प्रतिस्पर्धा गरिरहेको अफगानिस्तानलाई जित दिलाउनका लागि बिहीबार रसिदले महत्वपूर्ण भूमिका निर्वाह गरे । जन्मदिनमा अफगानिस्तानका लागि उनले ब्याटिङ बलिङ, फिल्डिङ तीनै पक्षमा सशक्त प्रदर्शन गरे । महत्वपूर्ण खेलमा अफगानिस्तानले बंगलादेशलाई एक सय ३६ रनको भारी अन्तरले पराजित गर्यो ।
अफगापिनस्तानका लागि नवौं नम्बरमा ब्याटिङ गर्न मैदान छिरेका उनले ३२ बलमा ८ चौका र एक छक्कासहित ५७ रन बनाएर अविजित रहे । बलिङमा पनि उनको प्रदर्शन निकै उत्कृष्ट रह्यो। ९ ओभर बलिङ गरेका उनले ३ ओभर मेडन खेल्दै १३ रन दिएर २ विकेट लिए भने उनले अर्का एक बंगलादेशी खेलाडीलाई रन आउटसमेत गराए ।
यो खेलको नतिजा दुवै टोलीका लागि हार र जितमा मात्रै सीमित रह्यो । दुवै टोलीले यसअघि नै ‘सुपर फोर’ चरणको यात्रा तय गरिसकेका छन् । आबुधाबीस्थित शेख जायद अन्तर्राष्ट्रिय स्टेडियममा टस जिती पहिलो ब्याटिङ गरेको अफगानिस्तानले निर्धारित ५० ओभरमा सात विकेट गुमाउँदै दुई सय ५५ रनको योगफल खडा गरेको थियो । जवाफमा आएको बंगलादेशलाई ४२.१ ओभरमा मात्रै एक सय १९ रनमा रोक्दै अफगानिस्तानले समूहगत चरणमा आफूलाई अपराजित राख्न सफल रह्यो ।
अफगानिस्तानका लागि उनीभन्दा अघि हस्मतुल्लाह सहिदीले ५८ रन तथा प्रारम्भिक ब्याट्सम्यान मोहमद सेहजादले ३७ रन जोडेका थिए । अन्य ब्याट्सम्यानले भने गतिलो प्रदर्शन गर्न सकेनन् । आफूले तय गरेको मध्यम योगफलको रक्षा गर्ने क्रममा उनै रसिदले बलिङ र फिल्डिङबाट सशक्त प्रदर्शन गरे । उनले बंगलादेशका महत्वपूर्ण खेलाडी सकिब अल हसन (३२) र मोहमदुल्ला (२७) लाई आउट गराएका थिए ।
त्यसपछि नवौं क्रममा ब्याटिङका लागि क्रिजमा छिरेका अबु हैदरलाई एक रन बनाएर खेलिरहेको अवस्थामा उनै रसिदले रन आउट गराउँदै अफगानिस्तानलाई जिततर्फ अग्रसर गराएका थिए । बंगलादेशविरुद्धको खेलमा टोलीलाई विजयी बनाउन मैदानमा छाएका रसिद म्यान अफ दि म्याचसमेत चुनिए ।
रसिदबाहेक मुजिब उर रहमान र गुलबदिन नइबले पनि दुई÷दुई विकेट लिँदा बंगलादेशी खेलाडी क्रिजमा लामो समय टिक्न सकेनन् । बंगलादेशका लागि सकिब र मोहमदुल्लाले जोडेको रन नै कुनै पनि खेलाडीले व्यक्तिगत जोडेकोमध्ये सर्वाधिक रह्यो । मोसादेक हुसेनले अविजित २६ रन जोड्दा अन्य खेलाडीले दोहोरो अंकमा रन जोड्न सकेनन् । बलिङतर्फ बंगलादेशका सकिबले अफगानिस्तानको चार विकेट लिएका थिए ।
रसिद खान अहिले विश्वकै उत्कृष्ट बलर बन्न सफल भइसकेका छन् ।आइसीसीको टीट्वीन्टी बलर बरियतामा पहिलो नम्बरमा रहेका रसिद एक दिवसीयमा द्रोस्रो बरियतामा छन् । एक दिवसीयमा रसिदभन्दा अगाडी भारतका फास्ट बलर जसप्रिट बुमराह रहेका छन् । रसिदले एक दिवसीय क्रिकेटको अलराण्डरको बरियतामा पनि सातौं नम्बरमा स्थान बनाइसहेका छन्।
अफगानिस्तानले यसै वर्ष मात्रै टेस्ट मान्यता पाएको छ ।
प्रतिक्रिया दिनुहोस !
