काठमाडौं : साबिक विजेता नेपालले बंगबन्धु गोल्डकपमा मंगलबार ताजकिस्तानविरुद्ध खेल्दै आफ्नो उपाधि रक्षाको अभियान सुरु गर्दै छ । अन्योलका बीच प्रतियोगिता खेल्न बंगलादेश पुगेको नेपालले मंगलबार समूहगत चरणको आफ्नो पहिलो खेलमा ताजकिस्तानको सामना गर्न लागेको हो ।
बंगलादेश फुटबल संघले गत वर्ष जितेको उपाधिको पूरा पुरस्कार रकम नदिएपछि प्रतियोगिता खेल्न नजाने अडानमा बसेको अखिल नेपाल फुटबल संघ (एन्फा) ले अन्तिम समयमा सहभागी हुने निर्णय गरेको थियो । बंगलादेशबाट बाँकी रहेको रकम २५ हजार डलर प्राप्त भएपछि एन्फाले प्रतियोगितामा आफ्नो राष्ट्रिय टोली पठाउने निर्णय गरेको थियो ।
सोही कारण नेपाली टोलीले प्रतियोगिताका लागि लामो समयको तयारीसमेत गर्न पाएको छैन । नेपाली टोली बंगलादेश जानुअघि मुस्किलले एक साताको बन्द प्रशिक्षणमा बसेको थियो । यद्यपि, नेपाली टोलीले प्रतियोगितामा उपाधि रक्षा गर्ने रणनीति सार्वजनिक गरेको छ । ‘सहभागी हुने÷नहुने अन्योलका बीच हामी चार÷पाँच दिनको तयारीमा यहाँ आएका छौं’, नेपाली राष्ट्रिय टोलीका अन्तरिम प्रशिक्षक बालगोपाल महर्जनले भने, ‘यद्यपि हामी प्रतियोगिताको साबिक विजेता टोली हौं । प्रतियोगिताका लागि हामीले योजना बनाइसकेका छौं । त्यहीअनुसार खेल्ने छौं ।’
नेपाली टोलीले पछिल्लो केही समययता निरन्तर अन्तर्राष्ट्रिय प्रतियोगिता खेलिरहेकाले छोटो अवधिको तयारीमा पनि प्रशिक्षक महर्जन राम्रो प्रदर्शन हुनेमा आशावादी देखिएका छन् । नेपाली टोलीले गत अगस्ट र सेप्टेम्बरमा इन्डोनेसियामा भएको एसियाली खेलकुद र त्यसपछि बंगलादेशमा भएको साफ च्याम्पियनसिप खेलेको थियो । सो दुई प्रतियोगितामा सहभागी भएका खेलाडीहरू नै टोलीमा समावेश छन् ।
एक वर्षअघि बहराइनको यू–२३ टोलीलाई फाइनलमा ३–० गोलले पराजित गर्दै उपाधि जितेको नेपाल त्यही इतिहास दोहोर्याउने उद्देश्यसहित प्रतियोगिताको पहिलो खेलमा ताजकिस्तानको चुनौतीका लागि तयार भएको छ । यद्यपि ताजकिस्तान नेपालका लागि मुस्किल प्रतिद्वन्द्वी रहँदै आएको छ । नेपाल ताजकिस्तानविरुद्ध भएको आफ्नो पछिल्लो दुईमध्ये दुवै खेलमा पराजित छ । त्यसैले नेपाललाई आफ्नो उपाधि रक्षाको अभियानको पहिलो खेल नै मुस्किल देखिएको छ ।
सन् २०१९ मा हुने एसियाली फुटबल महासंघ (एएफसी) एसिया कप छनोटअन्तर्गत गत वर्ष भएको तेस्रो चरणको छनोटको समूह एफको दुईमध्ये दुवै खेलमा नेपालले ताजकिस्तानसँग पराजय बेहोरेको छ । पहिलो खेलमा २–१ गोलले पराजित भएको नेपाल दोस्रो खेलमा ३–० गोलले पराजित हुन पुगेको थियो । त्यसैले नेपाललाई ताजकिस्तानविरुद्धको चुनौती पन्छाउँदै अघि बढ्न निक्कै मेहनत गर्नुपर्ने देखिएको छ ।
प्रशिक्षक महर्जनले ताजकिस्तान बलियो प्रतिद्वन्द्वी रहेको प्रति आफू सजग रहेको बताए । उनले ताजकिस्तानविरुद्ध कम्तीमा एक अंक भए पनि लिएरै छाड्ने बताए । ‘हामीले विगतमा ताजकिस्तानसँग खेलेका छौं । ती खेलको प्रदर्शनलाई विश्लेषण गर्दा पनि हामी ताजकिस्तानसँग सजग हुनुपर्ने अवस्था छ । ताजकिस्तान हामीभन्दा रणनीतिक र प्राविधिक रूपमा पनि बलियो देखिएको छ’, प्रशिक्षक महर्जनले भनेका छन्, ‘यद्यपि ताजकिस्तानसँग एक अंक भए पनि खोस्ने छौं ।’
प्रतिक्रिया दिनुहोस !
