काठमाडौं : राष्ट्रिय खेलकुद परिषद् (राखेप)को मंगलबार सम्पन्न बोर्ड बैठकले आठौं राष्ट्रिय खेलकुद प्रतियोगिताको मिति सार्ने निर्णय गरेको छ । नुवाकोटको ककनीमा दुई दिनसम्म चलेको बोर्ड बैठकले भौतिक पूर्वाधार र अन्य केही प्राविधिक कारणले आठौं राष्ट्रिय खेलकुदको मिति दुई महिना सार्ने निर्णय गरेको हो । बैठकमा उपस्थित एक सदस्यका अनुसार माघ २५ देखि फागुन ३ सम्म आयोजना गर्ने गरी आठौं राष्ट्रिय खेलकुदको नयाँ मिति तय गरिएको छ ।
यसअघि आठौं राष्ट्रिय खेलकुद मंसिर २१ देखि २८ सम्म मध्यपश्चिमाञ्चलको नेपालगन्जमा आयोजना गर्ने गरी मिति निर्धारण गरिएको थियो । ‘पहिले तोकिएकै समयमा पनि प्रतियोगिता आयोजना गर्न सकिन्थ्यो । तर, प्रतियोगितालाई अझ स्तरीय रूपमा आयोजना गर्न सकियोस् भनेर बोर्ड बैठकले माघ २५ देखि फागुन ३ सम्म आयोजना गर्ने गरी आठौं राष्ट्रिय खेलकुदको नयाँ मिति तोक्ने निर्णय गरेको छ’, ती बोर्ड सदस्यले अन्नपूर्णसँग भने । उनले भौतिक पूर्वाधार र अन्य केही प्राविधिक कारणले प्रतियोगिताको मिति सार्नु परेको जानकारी दिए ।
यसैगरी युवा तथा खेलकुदमन्त्री जगतबहादुर विश्वकर्माको अध्यक्षतामा बसेको बोर्ड बैठकले नेपालमै आयोजना हुने भनिएको १३औं दक्षिण एसियाली खेलकुद (साग)को मिति सार्न सम्बन्धित निकायसमक्ष प्रस्ताव राख्ने निर्णय पनि गरेको छ । युवा तथा खेलकुदमन्त्री राखेप बोर्डका अध्यक्ष पनि हुन् । बैठकले १३औं साग २०७६ सालको असोजमा आयोजना गर्न सकिने निष्कर्ष निकालेको जानकारी ती सदस्यले दिए ।
यसअघि सन् २०१६ को डिसेम्बर ३ मा काठमाडौंमा बसेको दक्षिण एसियाली ओलम्पिक काउन्सिलको बैठकले सन् २०१९ को मार्च ९ देखि १८ सम्म १३औं साग आयोजना गर्ने निर्णय गरेको थियो । २०७२ साल माघ २२ देखि फागुन ४ सम्म भारतको गुवाहाटी र सिलोङमा सम्पन्न १२औं सागको समापन समारोहमा १३औं साग आयोजनाको जिम्मेवारीसहित नेपाललाई झन्डा हस्तान्तरण गरिएको थियो ।
साग आयोजनाको मिति तोक्ने अधिकार भने दक्षिण एसियाली ओलम्पिक काउन्सिलसँग छ । नेपालले १३औं साग आयोजनामा ढिलाइ गरेपछि हालै इन्डोनेसियामा सम्पन्न १८औं एसियाली खेलकुद प्रतियोगिताका क्रममा जकार्तामा बसेको दक्षिण एसियाली ओलम्पिक काउन्सिलको बैठकले पनि नेपाली खेल अधिकारीसँग आधिकारिक धारणा माग गरेको थियो । नेपालले आयोजना गर्न असमर्थता जनाए १३औं साग आयोजनाका लागि आफू तयार रहेको श्रीलंकाले जनाउँदै आएको छ । १३औं सागमा २५ वटा खेल समावेश गर्ने निर्णयसमेत भइसकेको छ ।
यसैगरी राखेप बोर्ड बैठकले आठौं राष्ट्रिय खेलकुदका लागि विभिन्न उपसमिति गठन गर्ने निर्णय पनि गरेको छ । बैठकमा नेपाल ओलम्पिक कमिटी (एनओसी) को आधिकारिकताका विषयमा समेत कुरा उठेको ती बोर्ड सदस्यले जानकारी दिए । ‘बैठकमा नेपाल ओलम्पिक कमिटीको आधिकारिकतासम्बन्धी विवादलाई समाधान गर्ने विषयमा पनि छलफल भयो’, उनले भने ।
नेपालमा लामो समयदेखि दुईवटा ओलम्पिक कमिटी अस्तित्वमा छन् । रुक्मशमशेर राणा अध्यक्ष रहेको ओलम्पिक कमिटीलाई सर्वोच्च अदालतले मान्यता दिएको छ भने जीवनराम श्रेष्ठ अध्यक्ष रहेको ओलम्पिक कमिटीलाई अन्तर्राष्ट्रिय ओलम्पिक कमिटी (आईओसी)को मान्यता प्राप्त छ । सर्वोच्च अदालतले फैसला गरेको आठ वर्ष बितिसक्दा पनि अदालतको फैसला भने कार्यान्वयनमा आउन सकेको छैन ।
‘ओलम्पिक कमिटीको आधिकारिकतासम्बन्धी विवाद १३औं दक्षिण एसियाली खेलकुदको आयोजनासँग पनि जोडिने भएकाले यो विषय समाधान गरेर अगाडि बढ्नु आवश्यक रहेको भनेर बैठकमा छलफल भयो’, ती अधिकारीले भने । यसका अतिरिक्त विभिन्न खेलकुद संघमा देखिएको विवाद समाधान गर्ने विषयमा पनि बैठकमा गहन छलफल भएको बताइएको छ ।
प्रतिक्रिया दिनुहोस !
