जाजरकोट : नलगाड नगरपालिका–७ दल्ली र काँडादल्लीस्थित एक व्यक्तिको नाममा रहेको करिब २० रोपनी जग्गा अर्कै व्यक्तिलाई नामसारी गर्ने क्रममा वडाध्यक्षको नक्कली हस्ताक्षर प्रयोग गरिएको खुलेको छ । स्थानीय नरत्तम गिरीको नाममा रहेको जग्गा भतिजा नाता पर्ने भानुभक्तले केही समयपहिले आफ्नो नाममा ल्याएका थिए ।
नामसारी गर्ने क्रममा गाउँ सर्जिमिन मुचुल्का र सिफारिसमा नलगाड–७ का वडाध्यक्ष अर्जुनबहादुर सिंहको नक्कली हस्ताक्षर मालपोत कार्यालयमा पेस गरिएको खुलेको हो । वडाध्यक्ष सिंहले प्रेस विज्ञप्ति जारी गरी असोज १० गते मिलेमतोमा जग्गा नामसारी शीर्षकमा अन्नपूर्ण पोस्ट्मा प्रकाशित समाचारप्रति गम्भीर ध्यानाकर्षण भएको बताएका छन् । ‘वडा कार्यालयको छाप र लेटरप्याड दुरुपयोेग गरी वडासदस्य शेरबहादुर नाथले मेरो किर्ते हस्ताक्षर गरेर मालपोतबाट जग्गा नामसारी गरेको पाइयो ।
समाचार प्रकाशन भएपछि मात्र उक्त कुराको जानकारी पाएँ’, उनले भने, ‘सबै नक्कली कागजात पेस गरिएको रहेछ । त्यस कार्यमा मेरो कुनै संलग्नता छैन ।’ सिफारिसको हस्ताक्षर र प्रेस विज्ञप्तिको सिफारिस मिल्दैन । जग्गाधनी नरत्तम गिरी लामो समयदेखि भारतमा बस्दै आएका छन् । तत्कालीन माओवादी द्वन्द्वका बेला भतिजा नाता पर्ने भानुभक्तलाई घरजग्गा हेरिदिनू, बाली लगाएर खानू भनेर सपरिवार भारत गएका थिए । २२ वर्षअघि भारत छिरेका उनी त्यसयता तीन पटक घरमा आएर आफन्तलाई भेटेर फर्किएका थिए । तर, अहिले सम्पर्कविहीन छन् । गिरीका श्रीमती, एक छोरा र एक छोरी भारतमै छन् ।
उनी लामो समयसम्म नफर्केको मौका छोपी उक्त जग्गा भानुभक्तले वडासदस्य नाथसँगको मिलेमतोमा केही दिनअघि आफ्नो नाममा नामसारी गरेका हुन् । उनले साविकको खगेनकोट गाविस–१ मा रहेको २९१, ३२१ र ३२३ कित्ता तथा वडा नम्बर २ मा रहेको १३२ नम्बर कित्ता रहेको २० रोपनी तीन आना तीन पैसा जग्गा आफ्नो नाममा ल्याएको मालपोत कार्यालयको रेकर्डमा उल्लेख छ । आफ्नो नाममा जग्गा ल्याएलगत्तै गिरीले कित्ता नम्बर ३२१ को जग्गा बुहारी माया गिरी र वडासदस्य शेरबहादुर नाथलाई एक/एक रोपनी रजिस्ट्रेसन पास गरिदिएका छन् ।
जग्गाधनी नरत्तम लामो समयदेखि बेपत्ता भएको र सबैभन्दा नजिकको नातेदार आफैं भएको दाबी गर्दै भानुभक्तले वडा कार्यालयको सर्जिमिन मुचुल्कासमेत पेस गरेका छन् । मालपोत कार्यालयका प्रमुख अभिबहादुर गिरीले वडा कार्यालयको सिफारिस र गाउँ सर्जिमिन मुचुल्काका आधारमा पछि जग्गाधनी सम्पर्कमा आए जग्गा फिर्ता गर्ने गरी नामसारी गरिदिएको बताए ।
प्रतिक्रिया दिनुहोस !
