माथिल्लो डोल्पामा पहिलो झोलुङ्गे पुल, अब बगाउँदैन भेरीले
असोज २६, २०७५ शुक्रबार १७:३४:०
दुनै,डोल्पा : हिमाली जिल्ला डोल्पाको माथिल्लो डोल्पामा झोलुङ्गे पुल बन्दा स्थानीयको खुसीले गदगद भएका छन् । शे–फोक्सुण्डो गाँउपालिकाको साल्दाङ्ग किराथाङमा पहिलो पटक झोलुङ्गे पुल बनेपछि स्थानीयको खुसीले रमाएका हुन् ।
साबिकको साल्दाङ गाविस साल्दाङ–३ मा पर्ने किराथाङ खोलामाथि कुल ४० लाख लागदमा ११५ मिटरको पुल निर्माण गरिएको शे–फोक्सुण्डो गाउँपालिकाका अध्यक्ष टासिटुण्डुप गुरुङले जानकारी दिए । उनले भने, ‘सदियौँँको भेरी तरेर काममा जानु पर्ने दु:खका दिन गए ।’
करिब २ वर्षमा पहिलो पटक झोलुङ्गे पुल निर्माण भएपछि क्याप्जे जिग्मे ठ्रोग्याल रिम्पोछेले पूजापाठ गरेर झोलुङ्गे पुलको उद्घाटन गरेका छन् । हरेक साल बर्षायाममा भेरी तरेर स्थानीयले ज्यान गुमाउनु परेको स्मरण गर्दै गुरु रिम्पोछेले पूजा गरी पुलको उद्घाटन गरेको वडा नम्बर ४ का अध्यक्ष पेमावाङ्जेन लामाले जानकारी दिए ।
नेपाल सरकार पुल तथा झोलुङ्गे पुल डिभिजन कार्यालयले २ वर्ष लगाएर निर्माण गरेको पुलले साबिकको साल्दाङ गाविसको कोमास, तिन्जे लगाउत विश्वको उच्च मानवबस्ती रहेको धो उपत्यकालाई जोड्ने जानकारी दिएको छ ।
भेरी छिचोल्दै नेपालकै बस्ती र तिब्बतको जोखिमपूर्ण यात्रा गर्न बाध्य भोटबासीका लागि झोलुङ्गे पुलले खुसी ल्याएको छिरिङटासी लामाले बताए । उनले भने, ‘हरेक बर्ष चौरी गोठाला र अन्यको ज्यान जान्थ्यो । पुस्तौपछि बनेको यो पुलले चौरी गोठाला र भोटबासीको ज्यान जोगाउने भयो, सरकारलाई धन्यवाद ।’
यो पुलले माथिल्लो डोल्पाका स्थानीयलाई मात्रै नभइ पर्यटकलाईसमेत सहज भएको छ । ‘वर्षायाममा भेरी बढेर तर्न नसकिने तथा हिउँदमा चिसोेले समस्या हुन्थ्यो’, पर्यटन व्यवसायी नुर्बु लामाले भने, ‘पुल बनेपछि ढुक्को यात्रा गर्न पाइएको छ । अब माथिल्लो डोल्पामा पर्यटक भित्र्याउने बाटो पनि खुल्यो, अझै, दर्जनौ खोला र नदीमा पुल हाल्न बाँकी छ ।’
यसै वर्ष मात्र भेरीमै एक याक गोठालाको तिब्बतबाट घर फर्किने क्रममा बगाएर मृत्यु भएको थियो । हरेक वर्ष गोठाला गुमाएको पीडा सम्झीदै टसिग्याल्छेन गुरुङ भक्कानिए । उनी भन्छन्, ‘हरेक वर्ष कोही न कोहीले ज्यान त गुमाउनु पर्थ्यो अब ती दिन सम्झन पनि मन छैन ।’
यस बर्ष मात्र माथिल्लो डोल्पाका ३ गाँउपालिकाका एक दर्जन भन्दा धेरै काठेपुल बगेकाले जोखिमपूर्ण अवस्था छ । छिटो भन्दा छिटो झोलुङ्गे पुल निर्माण गरिदिन भोटवासीले सरकारसँग आग्रह गरेका छन् । तर माथिल्लो डोल्पामा ढुवानी गर्न कठिन भएकाले सरकारले चासो नदिने गरेको नगारिकको आरोप छ ।
प्रतिक्रिया दिनुहोस !
