कालिकोट : सदरमुकाम मान्म बजारमा स्थानीय पसलेको सुन र नगद सहितको झोला चोरी गर्ने तीन जनालाई प्रहरीले सिसिटिभीको सहायतामा पक्राउ गरेको छ ।
सिसिटिभीको भिडियोको आधारमा चोर पक्राउ गरिएको जिल्लामै यो पहिलो घटना हो । जिल्ला प्रशासन कार्यालय र जिल्ला प्रहरी कार्यालयको पहलमा सिसिटिभी जडान गरिएको एक सातामै शनिबार पक्राउ गरिएको हो ।
झोला चोरी गरी सुर्खेत तर्फ जाँदै गरेका तीन जना अशोक चौधरी, दिनेश चौधरी र रमेश चौधरी पक्राउ परेका हुन् । शनिबार बिहान ६ बजेपछि मान्म बजारमा स्थानीय व्यापारी रिताकुमारी शाहीको पसलअघिबाटै उनको झोला चोरी भएको हो ।
पसले शाहीले पसलअघि राखेको झोला करिब ३ घण्टापछि नभेटिएपछि प्रहरीकहाँ उजुरी दिइन् । प्रहरीले साँझ सिसिटिभीको फूटेज हेर्दा झेला लिएर गएका मान्छेहरु गाडी चडेर सुर्खेत तिर गएको देखियोे ।
तत्काल दैलेखको राकममा रहेको प्रहरी चौकीललाई खबर गरी झोला लिएर जाने व्यक्तिहरु पक्राउ गरी कालिकोट ल्याइएको हो । दाङ घर भइ कालिकोटमा काम गर्दै आएका अशोक, दिनेश र रमेशलाई जिल्ला प्रहरी कार्यालयले पक्राउ गरी नियन्त्रणमा लिएको छ ।
झोला हराएकी रिता शाहीले झोलामा भएका नगद र सुन नभेटिएको दावी गरेपछि प्रहरीले उनीहरुलाई पक्राउ गरिराखेको हो । मान्ममा प्रहरीले सिसिटिभीको प्रयोग गरी दसैंको लागि बजार सुरक्षा अनुगमन गर्दै आएको छ ।
प्रतिक्रिया दिनुहोस !
