अछाम : दुबै मृगौलाले काम नगर्ने भएपछि सहयोगको याचना गरेका मंगलसैन नगरपालिका–९ ओलीगाउँ निवासी २६ वर्षीय श्याम रावललाई जापानबाट उपचारको लागि सहयोग प्राप्त भएको छ ।
जापानमा अध्ययनरत अछामका युवाहरुको समुह अछाम सरोकार मञ्च जापानले ५० हजार आर्थिक सहयोग गरेको हो । मंंगलसेन नगरपालिका–९ ओलीगाँउ घर भइ बान्नीगढी जयगढ गाँउपालिका–५ कालिका लिडिमा बस्दै आएका २६ वर्षीय मृगौला पीडित रावलको आर्थिक अभावका कारण उपचारमा हुन सकेको छैन ।
अछाम सरोकार मञ्च जापानका कोषाध्यक्ष रविन रावलले जापानमा रहेका युवाहरुले मिलेर एउटा युवाको ज्यान बचाउन सहयोग गरेको बताए । श्रीमती, एक छोरी, आमा साथ रहेको रावलको परिवारको न्युन आम्दानी छ । युवा उमेरमै मृगौलाले काम नगर्ने भएको तीन वर्ष बितिसक्दा पनि उपचार गर्न नसकेका रावलले थप सहयोगको लागि सहयोगी दाताहरुसँग अनुरोध गरेका थिए ।
तीन वर्षदेखि मृगौलाको डाइलोसिस गर्दै आएका रावलले महंगो उपचार खर्चका कारण दैनिक गुजारा चलाउनै मुस्किल रहेको बताएका छन् । सोमबार एक कार्यक्रमका बीच रावललाई बान्नीगढी जयगढ गाउँपालिकाका अध्यक्ष राजेन्द्र खड्काले रकम हस्तान्तरण गर्दै व्यक्तिगत सहयोग समेत गर्ने प्रतिवद्धता व्यक्त गरे ।
प्रतिक्रिया दिनुहोस !
