रक्सीले निम्त्यायो झगडा : चापाकोटका मेयरलाई कालिकोटमा भक्तपुरका युवाले कुटे

कालिकोट : रारा भ्रमणबाट फर्किएका स्याङ्जाको चापाकोट नगरपालिका प्रमुखको टोली र भक्तपुरबाट घुम्न गएको टोलीबीच कालिकोटमा मदिरा पिएर कुटाकुट भएको छ । मुगुको रारा भ्रमणबाट आएका चापाकोटका नगरप्रमुख शिव गिरीको टोली र भक्तपुरबाट आएको टोलीबीच कुटाकुट हुँदा नगर प्रमुख गिरी घाइते भएका हुन् ।

शनिबार राति दुवै टोली कालिकोट सदरमुकामको सनलाइट होटेलमा बास बसेका थिए । त्यही क्रममा नगर प्रमुख गिरी र भत्तपुरबाट आएको टोलीबीच च्याङ्ग्राको मासु खाने विषयमा झडप भएको हो । 

झडपमा नगर प्रमुख गिरी, उनका स्वकीय सचिव राजकुमार मल्ल, नगर प्रहरी इन्चार्ज शोभित थापा र सवारी चालक घाइते भएको प्रहरीले जनाएको छ । रारा भ्रमण निस्केको भक्तपुरको भ्रमण टोली र चापाकोट नगरपालिकाको टोलीबीच मदिर पिएपछि च्याङ्ग्राको मासु पोलेर खाने बेला अपशब्द बोल्दै कुटाकुट भएको थियो । 

झगडामा संलग्न ८ जनालाई नियन्त्रणमा लिइएको जिल्ला प्रहरी कार्यालय कालिकोटका निमित्त प्रहरी इन्सपेक्टर देवेन्द्रकुमार मल्लले जानकारी दिए । 

उनका अनुसार मेयरको टोलीलाई कुटपिट गर्ने भक्तपुरका सुजन पौडेल, मधु थापा मगर, निराजन थापा, प्रविन कासुला, रामेसोर गौतम, राजिन श्रेष्ठ, सिन्धुपाल्चोकका विकास श्रेष्ठ र सुर्खेतका निराजन बुढालाई प्रहरीले नियन्त्रणमा लिएको छ । 

घाइतेहरु जिल्ला अस्पताल कालिकोटमा उपचार गराई स्याङ्जा फर्किएको जिल्ला प्रहरी कार्यालय कालिकोटले जनाएको छ ।