जुम्ला : यहाँका दुईवटा स्थानीय तहमा गयराति आक्रमण भएको छ । अज्ञात समूहले जिल्लाको चन्दननाथ नगरपालिका र गुठिचौर गाँउपालिकामा शनिबार राति आक्रमण भएको हो ।
आक्रमणबाट नगरपालिकाको गाडी जलेको छ । त्यसैगरि गाउँपालिका महत्वपूर्ण कागजपत्र पनि जलाइएका छन् । आक्रमण किन र कसले गर्यो भन्ने नखुलेको जिल्ला प्रहरी कार्यालय जुम्लाले जनाएको छ ।
चन्दननाथ नगरपालिकाको प्राङ्गणमा रोकिएको क १ झ १ नम्बरको गाडी आगजनीबाट पुरै जलेको छ । राति सवा एक बजे नगरपालिकाका पाले बिष्णुप्रसाद न्यौपानेले गाडीमा आगो लागेको थाहा पाएपछि सबैलाई जानकारी गराएका थिए ।
उनले आफू सुतिरहेको अवस्थामा ढोकामा अज्ञात व्यक्तिले ढोकामा हानेपछि खोलेर हेर्दा गाडी जलिरहेको बताए । त्यसपछि स्थानीय र प्रहरीको सहयोगमा आगो नियन्त्रणमा लिइएको थियो ।
जलेको गाडी ४० लाख रुपैयाँको रहेको निमित्त प्रशासकीय अधिकृत ज्ञानेन्द्र बुढ्थापाले बताए । यतिखेर नगरपालिकाका मेयर भारतमा र प्रमुख प्रशासकीय अधिकृत रारा भ्रमणमा गएका छन् ।
यस्तै जिल्लाको गुठीचौर गाउँपालिकाको कार्यालयमा तोडफोड गरी कम्प्युटरसहितका विद्युतीय सामग्रीहरु नष्ट गरिएका छन् ।
कार्यालयभित्रको लाखौँका सामग्री नष्ट भएको प्रमुख प्रशासकीय अधिकृत केशवप्रसाद शर्माले जानकारी दिए । ‘गाउँपालिका कार्यालयमै आगजनी गर्ने प्रयास गरिएको देखिन्छ, तर कागजहरु मात्र जलेछन्’ उनले भने ।
गाउँपालिकामा जडान गरिएको सीसी क्यामरा पनि चुँडेर फालिएको छ । जुम्लाका प्रहरी नायव उपरीक्षक सीताराम रिजाल घटनास्थलको वास्तविकता बुझ्न त्यहाँ पुगेका छन् । घटनाको विवरण संकलन गरि अनुसन्धान थालिएको निमित्त प्रमुख जिल्ला अधिकारी टेकबहादुर बुढ्थापाले बताए ।
प्रतिक्रिया दिनुहोस !
