काठमाडौं : घरेलु लिगको सफल टोली नेपाल पुलिस क्लबलाई स्तब्ध बनाउँदै संकटा क्लब पल्सर सहिद स्मारक ‘ए’ डिभिजन लिगको दोस्रो स्थानमा उक्लिएको छ । छैटौं चरणअन्तर्गत एन्फा कम्प्लेक्स मैदानमा मंगलबार भएको खेलमा संकटाले पुलिसलाई २–१ गोलले हरायो ।
संकटासँगको नमीठो हारले पुलिसको अगाडि यात्रामा धक्का लागेको छ । प्रतिस्पर्धात्मक खेलमा दुवै टोलीले पहिलो हाफमा गोल गरेका थिए । संकटाले २९औं मिनेटमा रक्षक सरोज दाहालको गोलमा अग्रता लिएको थियो । सरोजले लक्ष्मण रुचालको कर्नर पासमा अनमार्क हेड गोल गरेका थिए । पुलिससँग जोसिलो खेल खेलेको संकटाले ३७औं मिनेटमा दोस्रो गोल गरेको थियो ।
मध्यभागबाट एक्लै बल दौडाएका दीपेश आलेमगरले पुलिसका गोलरक्षक शत्रुधन चौधरीसँग वान भर्सेस वानमा गोल गर्दै संकटाको अग्रता दोब्बर बनाए । दुई गोलपछि रक्षात्मक देखिएको संकटामाथि पुलिसले ३९औं मिनेटमा एक गोल फर्कायो । पुलिसका रविशंकर पासवानले पोस्ट नजिकबाट गोल गरे । उनले अभिषेक रिजालको पासमा वानटज जाली चुमाएका थिए । मध्यभागमा राम्रो देखिएको पुलिसको अग्रपंक्ति कमजोर देखिएको थियो । संकटाले दोस्रो हाफमा थप गोल गर्ने अवसर बनाए पनि सफल हुन सकेन । जितसँगै ६ खेलबाट १५ अंक बनाएको संकटा तालिकाको दोस्रो स्थानमा उक्लिएको छ । एक खेल कम खेलेको मनाङ मस्र्याङ्दी समान १५ अंकका साथ शीर्ष स्थानमा छ । यसअघि १० अंक बनाएको पुलिस पाँचौं स्थानमा छ ।
एपीएफको दोस्रो जित
यसैगरी एन्फा मैदानमै भएको अर्को खेलमा विभागीय टोली एपीएफ क्लबले एनआरटी क्लबलाई २–१ गोलले हराएको छ । एपीएफले खेल सुरु भएको तेस्रो मिनेटमै खाता खोलेको थियो । एपीएफका लागि युवराज खड्काले गोल गरे । एपीएफको गोलपछि खेलमा फर्किएको एनआरटीले १५औं मिनेटमा बराबरी गोल फर्कायो । एनआरटीका लागि राजेश परियारले बराबरी गोल गरेका थिए । दोस्रो हाफमा सुधारिएको खेल खेलेको एपीएफले ७३औं मिनेटमा पेनाल्टीमार्फत निर्णायक गोल गरेको थियो । पेनाल्टीको सुदीप डीबक्स सिख्राकारले सदुपयोग गरे ।
एनआरटीका असिम गुरुङले डीबक्सभित्र एपीएफका युवराज खड्कालाई लडाएपछि एपीएफले पेनाल्टीको मौका पाएको थियो । लिगमा एपीएफको यो दोस्रो जित हो । जितसँगै सात अंक बनाएको एपीएफ सातौं स्थानमा उक्लिएको छ । एनआरटीले भने पछिल्ला पाँचवटै खेलमा हार खेपेको छ । एनआरटीले पहिलो खेलमा बलियो आर्मीलाई २–२ गोलको बराबरीमा रोकेको थियो । एक अंकमा सीमित एनआरटी तालिकाको अन्तिममा छ ।
प्रतिक्रिया दिनुहोस !
