यूएई : अफगानिस्तानमा १७ वर्षदेखि जारी युद्ध अन्त्यको लागि पहल गर्न भन्दै अमेरिकी उच्च अधिकारी र तालिबानीबीच भेटवार्ता भएको छ ।
यूनाइटेड अरब इमिरेट्समा सोमबार भएको वार्तामा साउदी, पाकिस्तानी र दुबईका प्रतिनिधि पनि सहभागी भएको तालिबानी प्रवक्ता जबिहुल्लाह मुजाहिदले बताएका छन् ।
कतारका लागि अमेरिकी राजदूत जाल्मे खालिलजादले यो वार्ता अन्तर अफगान संवादको लागि एक पहल भएको बताएका थिए । साथै अफगानिस्तानको द्धन्द्ध अन्त्य हुने विश्वास पनि उनले लिएका छन् ।
‘हामीले लामो समयदेखि नै के भन्दै आएका थियौँ भने, राजनीतिक रोडम्यापबारे छलफलका लागि अफगानीहरु आपसी सम्मान सहित तयार भएपछि मात्रै अफगानिस्तानमा युद्ध अन्त्य हुने छ,’ खालिलजादले भने । द्धन्द्ध अन्त्यको लागि तालिबान सहित अन्य इच्छुक समूहरुसँग वार्ता र संवादलाई निरन्तरता दिने पनि उनले बताएका छन् ।
अफगानी अधिकारीहरु भने सोमबारको वार्तामा सहभागी हुने अपेक्षा गरिएको थिएन । अफगान सरकारलाई अमेरिकी ‘पपेट’को आरोप लगाउँदै उनीहरुसँग प्रत्यक्ष वार्तामा नबस्ने तालिबानी समूहको अडानका कारण पनि अफगानी अधिकारीहरु सहभागी नहुने बुझिएको थियो । अमेरिकी प्रतिनिधि खालिलजादले यसअघि नै अफगानी अफगानी प्रतिनिधिहरुसँग छलफल गरिसकेका थिए ।
तालिबानले भने एक महिनाअघि नै कतारमा खालिलजादसँगको वार्ताबाट तीन उपलब्धि भएको भन्दै विज्ञप्ति नै जारी गरेको थियो । सेप्टेम्बरमा नियुक्ति लिएसँगै खालिलजादले शान्ति वार्ताका लागि विभिन्न भेटवार्ताको माध्यमबाट पहल गर्दै आएका छन् । यसअघि उनले पाकिस्तानी प्रधानमन्त्री इमरान खान लगायत अधिकारीहरुसँग भेटवार्ता गरिसकेका छन् ।
प्रतिक्रिया दिनुहोस !
