रामेछाप : अतिरिक्त हुलाकका कर्मचारीहरुले निजामती कर्मचारी सरह पूरा काम र पूरा दामको व्यवस्था गर्नुपर्ने माग राखेका छन् ।
मंगलबार नेपाल अतिरिक्त हुलाक कर्मचारी एसोशिएसन रामेछाप जिल्ला कार्यसमितिको ११ औं वार्षिक भेलाका सहभागीहरुले यस्तो बताएका हुन् । जिल्ला सदरमुकाम मन्थलीमा भएको भेलामा अतिरिक्त हुलाक कर्मचारीहरुले तलब बृद्धिको माग समेत राखेका छन् ।
नेपाल अतिरिक्त हुलाक कर्मचारी एसोशिएसनका केन्द्रीय अध्यक्ष टंकप्रसाद हुमागाईँले राज्यले आफूहरुलाई अन्याय गरेको भन्दै तलब बढाउनुपर्ने बताए । अतिरिक्त हुलाक नियमावली २०३४ खारेज गरेर नयाँ व्यवस्था सहित काम र दामको बारेमा पुनरावलोकन गर्न पनि उनको माग छ ।
अध्यक्ष हुमागाईँले भने, ‘स्थानीय तहसम्म सेवा दिँदै आएको हुलाकको धरोहर मानिने अतिरिक्तका कर्मचारीहरुलाई प्रक्रिया पुर्याइ स्थायी र बढुवाको व्यवस्था गर्न राज्य तयार रहनुपर्छ ।’
अतिरिक्त हुलाक कर्मचारीहरु हाल दैनिक दुई घण्टाको दरले कार्यालयको काम गर्दै आएका छन् । पत्र वितरक, डाक बाहकले ६ हजार रुपैयाँ र हुलाक प्रतिनिधिले ६ हजार नौ सय २५ रुपैयाँ मासिक तलब पाउँदै आएका छन् । रामेछाप जिल्लाको विभिन्न आठ स्थानीय तहभित्र जम्मा ४४ वटा अतिरिक्त हुलाक कार्यालय सञ्चालनमा छन् भने त्यसमा एक सय ३१ जना अतिरिक्त हुलाकका कर्मचारीहरु छन् ।
प्रतिक्रिया दिनुहोस !
