काठमाडौं : अमेरिकी सरकारको सहयोगमा कैलालीको धनगढीमा सुदूरपश्चिमकै पहिलो ब्लड बैंक (रक्त सञ्चार केन्द्र) भवन निर्माण आरम्भ भएको छ ।
अमेरिकाले नेपाल सरकार तथा नेपाल रेडक्रस सोसाइटीसँगको साझेदारीमा भवन शिलान्यास गरेको हो ।
अमेरिकी रक्षा मन्त्रालयले उपलब्ध गराएको १५ लाख अमेरिकी डलर (करिब १७ करोड रुपैयाँ) सहयोगमा निर्माण हुने ब्लड बैंकले उक्त क्षेत्रमा लामो समयदेखि आवश्यक रक्त सञ्चार सेवा उपलब्ध गराउनेछ ।
धनगढी तथा सुदूरपश्िचमका बासिन्दाको जीवन रक्षा गर्ने रक्त सञ्चार सेवाका निम्ति ४ घण्टा यात्रा गरी बाँकेस्थित स्वास्थ्य संस्थामा जानुपर्ने समस्या देखेपछि अमेरिकाले सहयोग गरेको हो।
स्वास्थ्य मन्त्रालयले भवन निर्माणका साथै सुदूरपश्िचमका बासिन्दाको जीवन रक्षामा अमेरिकी दूतावाससँग साझेदारी गरेको छ । ब्लड बैंकले रगत भण्डारण र जटिल रक्त सेवासमेत उपलब्ध गराउने जानकारी दिइएको छ ।
ब्लड बैंकको भवन भूकम्पप्रतिरोधी समेत रहने सरकारी अधिकारीले बताए । शिलान्यासमा प्रदेश ७ का आन्तरिक मामिला तथा कानुनमन्त्री प्रकाश शाह, धनगढी नगरपालिका प्रमुख नृपबहादुर वड, स्थानीय पदाधिकारीका साथै नेपाल रेडक्रस सोसाइटी तथा अमेरिकी दूतावासका प्रतिनिधिहरूको उपस्थिति थियो ।
प्रतिक्रिया दिनुहोस !
