मेलबर्न : पुरुषतर्फ सर्वियाका नोभाक जोकोभिच र फ्रान्सका लुकास पोउली तथा महिलातर्फ जापानकी नाओमी ओसाका र चेक गणतन्त्रकी क्यारोलिना प्लिसकोभा अस्ट्रेलियन ओपन टेनिसको सेमिफाइनलमा पुगेका छन् ।
पहिलो वरीयताका जोकोभिच बुधबार भएको क्वार्टरफाइनल खेलमा आठौं वरीयतामा आसीन जापानी प्रतिद्वन्द्वी केई निसिकोरीलाई हराउँदै वर्षको पहिलो ग्रान्डस्लाम प्रतियोगिताको सेमिफाइनलमा पुगेका हुन् ।
खेलमा जोकोभिच ६–१, ४–१ ले अगाडि रहँदा स्वास्थ्य समस्याका कारण निसिकोरीले खेल परित्याग गरेका थिए । २८औं वरीयताका लुकास भने आफूभन्दा शक्तिशाली क्यानेडियन प्रतिद्वन्द्वी मिलोस रोनिकलाई हराउँदै उपाधि जित्ने अभियानमा थप एक खुड्किलो माथि उक्लिएका हुन् । लुकासले १६औं वरीयताका रोनिकलाई ७–६ (४), ६–३, ६–७ (२), ६–४ ले हराएका थिए ।
महिला एकलतर्फ क्वार्टरफाइनलमा चौथो वरीयताकी एसियन खेलाडी ओसाकाले युक्रेनकी एलिना भितोलिनालाई ६–४, ६–१ को सोझो सेटमा पाखा लगाइन् । भितोलिना छैटौं वरीयताप्राप्त खेलाडी हुन् । पहिलोपटक अस्ट्रेलियन ओपनको सेमिफाइनलमा पुगेकी २१ वर्षीया ओसाकाले सन् २०१८ मा यूएस ओपनको रूपमा आफ्नो जीवनको पहिलो ग्रान्डस्लाम उपाधि जितेकी थिइन् ।
ओसाकाले अब सेमिफाइनलमा प्लिसकोभाको सामना गर्नेछिन् । सातौं वरीयताकी प्लिसकोभा भने क्वार्टरफाइनलमा अनुभवी अमेरिकी खेलाडी सेरेना विलियम्सलाई ६–४, ४–६, ७–५ ले हराउँदै सेमिफाइनलमा पुगेकी हुन् । ३७ वर्षीया सेरेना २३ पटककी ग्रान्डस्लाम च्याम्पियन खेलाडी हुन् । उनले अस्ट्रेलियन ओपनको उपाधि पनि सातपटक जितेकी छन् । उनले पछिल्लोपटक सन् २०१७ मा अस्ट्रेलियन ओपनकै रूपमा अन्तिम ग्रान्डस्लाम उपाधि जितेकी थिइन् ।
प्रतिक्रिया दिनुहोस !
