विराटनगर : प्रदेश १ संसदको हिउँदे अधिवेशन आज (आइतबार) देखि सुरु हुँदैछ। दिउँसो ३ बजे प्रदेश १ को प्रदेशसभा भवन विराटनगरमा बैठक सुरु हुने भएको हो।
यस पटकको हिउँदे अधिवेशनबाट प्रदेश १ को नाम र स्थायी राजधानी टुंगो लगाउने तयारी छ। प्रदेशका सभामुख प्रदीपकुमार भण्डारीले राजधानीको नाम र राजधानीको विषय टुंगो लगाउने तयारी भइरहेको जानकारी दिए। भण्डारीले भरसक सर्वसमतीमा टुंगो लगाउने प्रयासका लागि आफूले सहजकर्ताको भूमिका खेलिरहेको बताए।
यसैबीच बैठक सुरु हुनु अघि प्रदेश १ का मुख्य मन्त्री शेरधन राईले विराटनगरमा पत्रकारहरूसँग अनौपचारिक छलफलको तयारी गरेका छन्। उनले विहान ११ बजे मुख्य मन्त्री तथा मन्त्री परिषद्को कार्यालयमा पत्रकारहरुलाई बैठकका बारेमा ब्रिफिङ गर्नेछन्।
बैठक र बैठकबाट हुने काम कारवाही तथा सरकारका भावी कार्यदिशा एवं समसामयिक विषयका बारेमा मुख्य मन्त्रीले जानकारी गराउने कार्यक्रम तय भएको राईका प्रेस संयोजक ध्रुव सुवेदीले जानकारी दिए।
प्रतिक्रिया दिनुहोस !
