महेन्द्रनगर : कञ्चनपुरको भीमदत्त नगरपालिका–३ निवासी एक दम्पत्तीले वैवाहिक वर्षगाँठ र जन्मदिनको अवसरमा अनाथ बालबालिकालाई सहयोग गरेका छन् ।
भीमदत्त नगरपालिका–३ बस्ने पुष्पराज भट्ट र लक्ष्मीदेवी भट्टले वैवाहिक वर्षगाँठ तथा जन्मदिनको अवसरमा अनाथालयमा आर्थिक सहयोग गरेका हुन् ।
उनीहरुले महेन्द्रनगरस्थित समाज कल्याण अञ्चल बाल अनाथालयमा आश्रित बालबालिकालाई नगद १५ हजार रकम सहयोग गरेका हुन् । भट्ट दम्पत्तीले नगद रकम अनाथालयमा बस्ने बालबालिकालाई प्रदान गरे ।
फजुल खर्च गर्नुभन्दा सामाजिक काममा खर्च गर्ने योजनाले अनाथालयमा आश्रित बालबालिकालाई सहयोग गरेको लक्ष्मीदेवी भट्टले बताइन् । त्यस अवसरमा सबै बालबालिकालाई टीका लगाइदिएर मिठाई र फलफुल समेत वितरण गरिएको थियो । अनाथालयमा २३ जना बालबालिका आश्रित छन् ।
प्रतिक्रिया दिनुहोस !
