पाकिस्तान सुपर लिग : सन्दीपको टिम लाहोरले मुल्तानलाई ६ विकेटले हरायो
फागुन १०, २०७५ शुक्रबार २२:५१:०
काठमाडौँ : पाकिस्तान सुपर लिग अन्तरगत आफ्नो डेब्यु खेलमै तीन विकेट लिएका सन्दीपले जितको स्वाद पनि लिन सफल भएका छन् । सन्दीपले पाकिस्तान सुपर लिगमा डेब्यु गर्दै ३ विकेट लिएको खेलमा उनको टिम लाहोर कलन्दर्सले मुल्तान सुल्तानलाई ६ विकेटको फराकिलो अन्तरले हराउन सफल भयो ।
विस्फोटक ब्याटिङ गरेको मुल्तानले पुरै २० ओभर खेल्दै दिएको २०१ रनको लक्ष्य पनि सन्दीपको टीम लाहोरले भेट्टाउन सफल भएको हो । उसका लागि डेभिड वाइजले अन्तिम बलमा छक्का प्रहार गर्दै सिजनको दोस्रो जित सुनिश्चित गराए ।
२०० भन्दा माथिको स्कोर पनि उछिन्ने क्रममा लाहोरका लागि कप्तान एबी डे भिलियर्स र डेभिड वाइजले पाँचौ विकेटका लागि ९८ रनको गतिलो साझेदारी गरेका थिए । सिजनको दोस्रो जित दर्ता गराएको लाहोरका लागि यी दुवैले जीतको आधार खडा गरे ।
पराजित भएको मुल्तानका लागि जुनइद खानले तीन विकेट लिए पनि जित दिलाउन सकेनन्।
यसअघि शारजहाँ क्रिकेट मैदानमा टस हारेर पहिले ब्याटिङमा उत्रेको मुल्तानले पुरै २० ओभर खेल्दै ६ विकेटको क्षतिमा २०० रनको गतिलो स्कोर खडा गरेको थियो । त्यसक्रममा लाहोर कलान्दर्सबाट डेब्यु बलिङ गर्दै सन्दीपले विस्फोटक व्याटिङ गरेको मुल्तान सुल्तान्सका तीन विकेट लिन सफल भए ।
४ ओभर बलिङ गरेका सन्दीपले महँगो सावित भए पनि तीन विकेट लिन सफल भए । ४ ओभर बलिङका क्रममा सन्दीपले ११.५० इकोनोमी राख्दै ४६ रन खर्चिएका थिए ।
विस्फोट ब्याटिङ गर्दै ४१ बलमा ८४ रन बनाएका मुल्तानका जेम्स भिन्सलाई सन्दीपले आफ्नो र टिमकै पहिलो विकेटका रुपमा फखर जमानको हातबाट क्याच आउट गराए ।
सन्दीपले त्यसपछि तेस्रो क्रममा आएका मुल्तानका क्याप्टेन सोयब मल्लिकलाई ८ बलमा १० रन बनाएको अवस्थामा क्याच आउट गराए । यो पटक उनले विएसेको हातबाट मल्लिकलाई क्याच आउट गराउँदै पेभेलियन फर्काए ।
त्यसपछि सन्दीपले ६ बलमा ७ रन बनाएको अवस्थामा आन्द्रे रसेललाई पेभेलियन फर्काए । पहिलो बलमा छक्का हानेका रसेल सन्दीपको तेस्रो बलमा पेभेलियन फर्किए । लाहोरका लागि सन्दीपपछि शाहीन शाह अफ्रिदीले ३ ओभर बलिङ गर्दै १५ रन खर्चिएर १ विकेट लिए ।
सुरुबाटै विस्फोटक बलिङ गरेको मुल्तानका लागि ओपनर जेम्स भिन्सले ४१ बलमा ८४ रनको शानदार पारी खेले । उनले ७ चौका र ६ छक्का पनि हानेका थिए । मुल्तानका लागि अर्का ओपनर उमार सिद्धिकले ३८ बलमा ५३ रनको अर्धसतकीय पारी खेले । सिद्धिकले आफ्नो पारीमा चार चौका र २ छक्का हानेका थिए ।
भिन्सको विस्फोटक व्याटिङ मद्दतमा मुल्तानले ४ विकेटको क्षतिमा पुरै २० ओभर खेल्दै २०० रनको गतिलो स्कोर खडा गर्न सफल भएको थियो ।
प्रतिक्रिया दिनुहोस !
