तनहुँ : दुई साताअघि भएको एक हत्याको घटनामा संलग्न अभियुक्त पक्रनका लागि तनहुँ प्रहरीले इन्टरपोलको सहयोग लिने तयारी गरेको बताएको छ ।
तनहुँको म्याग्दे गाँउपालिका–६ को शेराटारमा स्थानीय सुनिल पराजुलीको खुकुरी प्रहारबाट म्याग्दे–२ गुणादीका ३३ वर्षीय बालकुमार श्रेष्ठको ज्यान गएको थियो ।
स्थानीय वस्तु निकासीको ठेक्का पाएका श्रेष्ठसँग रकम माग गरेका पराजुलीले कुरा नमिलेपछि खुकुरी प्रहार गरेका थिए । घटनाको केही दिनमै उपचारका क्रममा गम्भीर रहेका श्रेष्ठको ज्यान गएको थियो ।
घटनालगत्तै पराजुली भारत फरार भएकाले पक्रनका लागि इन्टरपोलमार्फत पत्राचार गर्न लागिएको प्रहरी नायब उपरीक्षक श्यामु अर्यालले बताए । ‘लोकेशनका आधारमा भारतमा लुकेको आशंकामा पक्रनका लागि नेपाल प्रहरीको इन्टरपोल शाखामार्फत पत्राचार गरिएको छ,’ उनले भने ।
घटनामा संलग्नताको आशंकामा ६ जनालाई प्रहरीले नियन्त्रणमा लिइसकेको छ । फरार पराजुलीलाई पक्रेमा घटनाबारे सही निष्कर्षमा पुग्न सकिने प्रहरी ठम्याइ छ । घटनाले असुरक्षा बढाएको भन्दै दोषी पक्रन स्थानीय तथा मृतकका आफन्तले प्रशासनलाई दबाब दिएका छन् ।
प्रहरीले सहयोगीलाई पक्रे पनि पराजुलीलाई पक्रन नसकेकाले खोजी तीव्र पारेको थियो । खोजीका क्रममा उनी नेपालबाट भारत गएको निष्कर्ष निकालेपछि प्रहरीले उनलाई पक्रन इन्टरपोलको सहयोग लिन लागेको बताइएको छ । प्रहरी नायब उपरीक्षक अर्यालले इन्टरपोलमार्फत केही दिनभित्रै पराजुलीका नाममा पक्राउ नोटिस जारी गरिने जानकारी पाएको बताए ।
प्रतिक्रिया दिनुहोस !
