माथागढी (पाल्पा) : माथागढी गाउँपालिकाले चालु शैक्षिक सत्रदेखि स्थानीय पfठ्यक्रम लागू गर्ने भएको छ । स्थानीय पाठ्यक्रम बनाउने माथागढी जिल्लामा पहिलो गाउँपालिका हो ।
गाउँपालिकाले यस शैक्षिक सत्रमा पहिलो चरणमा कक्षा १ र ६ मा स्थानीय पाठ्यक्रम लागू गर्दै छ । गाउँपालिकाले अन्य विषयजस्तै १०० पूर्णांकको ‘हाम्रो माथागढी’ पुस्तक तयार गरी चालु शैक्षिक सत्रबाट स्थानीय पाठ्यक्रम लागू गरेको हो । केन्द्रीय पाठ्यक्रम विकास केन्द्र काठमाडौंसँगको परामर्श तथा स्वीकृतिमा माथागढी गाउँपालिकाले स्थानीय स्तरको पाठ्यक्रम तयार गरेको छ । पाठ्यक्रममा स्थानीय १३ वटा विषयवस्तु समेटिएको छ ।
‘हाम्रो माथागढी’ पुस्तकमा माथागढीको चिनारी, ऐतिहासिक पृष्ठभूमि, स्थानीय जातजाति, भाषाभाषी, ऐतिहासिक महŒवपूर्ण व्यक्तिको जीवनी परिचय र वडाको जनसंख्याको अवस्था, स्थानीय संस्कृति, प्रचलित स्थानीय संस्कारलगायत विषय समावेश छ । त्यस्तै, स्थानीय कला र सम्पदा, स्थानीय बोलीचाली र लिपि, स्थानीय व्यवसाय सीप र प्रविधि, स्थानीय उपचार विधि, जडीबुटीको अवस्था, स्थानीय खेल, भूगोल, आर्थिक गतिविधि र जीविकोपार्जन तथा स्थानीय पर्यटनको विषयवस्तु समेटिएको गाउँपालिकाका अध्यक्ष सन्तोषकुमार थापा मगरले बताए । पुस्तकमा जडीबुटीबाट हुँदै आएका परम्परागत उपचार पद्धति तथा झारफुक धामी–झाँक्रीजस्ता रूढीवादी उपचारमा देखिएको अन्धविश्वासबारे चर्चा गरिएको छ ।
पाठ्यक्रम आधारभूत तहमा लागू गरिँदै लैजाने बताइएको छ । कक्षा १ देखि ८ सम्म आधारभूत तहमा लागू भएको स्थानीय पाठ्यक्रम १०० पूर्णांकको रहनेछ । जसमा सैद्धान्तिक ५० र प्रयोगात्मक ५० पूर्णांकको हुनेछ । जसमा विद्यार्थीको मूल्यांकन प्रणाली कक्षा १ देखि ३ सम्म निरन्तर मूल्यांकनका आधारमा तोकिएको नमुनाअनुसार हुनेछ । कक्षा ४ देखि ८ सम्म परीक्षा प्रणालीअनुसार वस्तुगत, विषयगत तथा लामा छोटा प्रश्न समावेश गरी सैद्धान्तिक परीक्षा मूल्यांकन गरिनेछ । विद्यार्थीको कक्षामा प्रयोगात्मक कार्य मूल्यांकन गरी रेकर्डसमेत राखिने प्रमुख प्रशासकीय अधिकृत दीपककुमार नेपालीले बताए ।
माथागढीले लागू गर्ने हाम्रो माथागढीको पाठ्यक्रमको प्रारूपमा स्थानीय पाठ्यक्रमको परिचय, साधारण उद्देश्य, माथागढीको स्थानीय पाठ्यक्रमको उद्देश्यमा आधारित छ । स्थानीय पाठ्यक्रम विकास केन्द्रका संयोजक अशेष भट्टराईले कक्षाअनुसार पाठ्यक्रम स्तरीकृत गरिँदै लगिने बताए । पाठ्यक्रम लागू गर्न गाउँपालिकाले सबै पक्षसँग सुझाव लिएको थियो ।
स्थानीय पाठ्यपुस्तक तयार पारेर लागू गर्दा बालबालिकाले आफ्नो गाउँ ठाउँ, कला संस्कृति, भेषभूषा, सम्पदामा अपनत्व बढ्ने, भावनात्मक सम्बन्ध रहने, वातावरणको विकास हुने गाउँपालिकाका अध्यक्ष थापाले बताए । गाउँपालिकाभित्र रहेका ४० वटा सरकारी र ४ वटा संस्थागत विद्यालयमा चालु शैक्षिक सत्रबाटै स्थानीय पाठ्यपुस्तक हाम्रो माथागढी पठनपाठन हुने, बालबालिकालाई पुस्तक निःशुल्क उपलब्ध गराइनेछ । माथागढी गाउँपालिकाले थालेको स्थानीय पाठ्यक्रम निर्माणले जिल्लाका अन्य ९ वटा स्थानीय तहलाई समेत मार्गनिर्देशन गर्नेछ ।
प्रतिक्रिया दिनुहोस !
