तनहुँ : देवघाट–५ का वडाध्यक्षले विकासमा विभेद गरेको भन्दै स्थानीय कांग्रेस नेताको अगुवाइमा स्थानीयले वडा कार्यालयमा तालाबन्दी गरिदिएका छन् ।
देवघाटको भुवनटार र गोहीटार टोलमा सडक ग्राभेल नगरेको आक्रोशमा नेपाली कांग्रेसका वडा सभापति पूर्णबहादुर कुँवर नेतृत्वको टोलीले वडा कार्यालयमा सोमबार बिहानै ताला लगाइदिएका हुन् ।
उनीहरुले वडाध्यक्षले विकासमा समानता नगरेको आरोप लगाए । स्थानीय तहको चुनावमा कुँवर वडाध्यक्षका प्रत्यासी पनि थिए । उनले आफूनिकट क्षेत्रमा विकासका काम बढी दिएको तर अन्यत्र विकास नभएको गुनासो गरे ।
एउटै वडाका अन्य टोलमा सडक ग्राभेल र बोरिङबाट पानी वितरण पनि भएको तर आफ्नो टोलमा दुवै काम नभएको भन्दै स्थानीयले तालाबन्दी गरेको बताएका छन् ।
वडाध्यक्ष यालबहादुर गुरुङले भने आफूले विकासमा विभेद नगरेको प्रतिक्रिया दिएका छन् । प्रदेश सरकारबाट आएका योजना सबै टोलमा नपरेको भन्दै समावेश गराउन पहल गर्ने प्रतिवद्धता जनाए पनि तालाबन्दी हुनु दुःखद् भएको उनले बताए ।
सोमबार बिहान ११ बजे तालाबन्दी भएको थियो । तर केही घण्टापछि प्रहरीको रोहबरमा भएको वार्तापछि ताला खुलाइएको छ । इलाका प्रहरी कार्यालयको इञ्चार्ज र सशस्त्र प्रहरीको रोहबरमा भएको वार्तामा वडाध्यक्ष गुरुङले स्थानीयका माग सम्बोधन गर्ने बताएपछि ताला खुलेको हो ।
प्रतिक्रिया दिनुहोस !
