लन्डन : आइसीसी एकदिवसीय विश्वकप क्रिकेट अन्तर्गत सोमबार भएको खेलमा दक्षिण अफ्रिका र वेस्ट इन्डिजबीचको खेल नतिजाविहिन बनेको छ। बर्षाले प्रभावित खेल स्थगित भएपछि दुवै टोलीले अंक बाँडेका छन्। टस हारेर पहिले ब्याटिङ गरेको दक्षिण अफ्रिकाले ब्याटिङ गर्दा पानी पर्न थालेपछि खेल रोकिएको थियो।
खेल रोकिनुअघि दक्षिण अफ्रिकाले ७.३ ओभरमा दुई विकेटको क्षतिमा २९ रन बनाएको थियो। खेल स्थगित भएपछि दुवै टोलीले एक एक अंक पाएका छन्। यस खेल स्थगित हुँदा वेस्ट इन्डिजलाई केही घाटा लागेको छ। यसअघि तीन खेलमा लगातार हार खेपेको दक्षिण अफ्रिकाले चौथो खेलमा आएर एक अंक पाएको छ।
उद्घाटन खेलमा आयोजक इङ्ल्यान्डसँग एक सय चार रनले पराजित भएको दक्षिण अफ्रिका दोस्रो खेलमा बंगलादेशसँग २१ रनले हारेको थियो। तेस्रो खेलमा दक्षिण अफ्रिकालाई भारतले ६ विकेटले पराजित गरेको थियो। यसैगरी वेस्ट इन्डिजले तीन खेलबाट तीन अंक बनाएको छ। वेस्ट इन्डिजले यसअघि पहिलो खेलमा पाकिस्तानलाई सात विकेटले हराएको थियो। दोस्रो खेलमा अस्ट्रेलियासँग १५ रनले पराजित भएको थियो।
प्रतिक्रिया दिनुहोस !
