पोखरा : संकटमा रहेका ठूलो नीर बिरालोका तीन छाउराको पोखरामा उद्धार गरिएको छ । पोखरा–३२ सातमुहानेस्थित स्थानीयको मकैबारीमा अलपत्र अवस्थामा रहेका नीर बिरालोका छाउराको स्थानीयको सक्रियतामा उद्धार गरिएको हो ।
उद्धार गरिएका छाउरालाई पोखराको पचभैयास्थित जंगली जनावर तथा पन्छी उद्धार केन्द्र पोखरा जुलोजिकल पार्कमा उपचार भइरहेको पार्कका व्यवस्थापक विनय अधिकारीले जानकारी दिए । पार्कमा कास्की जिल्ला र छिमेकी जिल्लामा घाइते अवस्थामा फेलापरेका जंगली जनावरको उद्धार गरी उपचार हुँदै आएको छ । माउ नआएपछि अलपत्र परेको अवस्थामा तीन दिनपछि छाउराको उद्धार गरिएको पोखरा जुलोजिकल पार्कका अध्यक्ष हिमालयन बख्रेलले बताए ।
पोखरामा धेरै जंगली जनावर र तीनका छाउराहरु अलपत्र पर्न थालेपछि २०७२ साउन १५ गते देखि वन्यजन्तु उद्धार केन्द्रको रुपमा पार्क सञ्चालनमा आएको अध्यक्ष बख्रेलको भनाइ छ । अहिले उद्धार केन्द्रमा विभिन्न २६ प्रजातिका जनावर छन् । उद्धार गरिएका जनावर उपचारपछि पुरानै बासस्थानमा फर्कनसक्ने गरी निको भएपछि पुनः जंगलमै छाडिँदै आएको उनले सुनाए ।
ठूलो नीर बिरालो नेपालमा र विश्वमै संकट नजिक रहेको प्रजातिको बिरालो भएको संरक्षण क्षेत्रमा लामो समय काम गरेका राजु आचार्यले बताए । नेपालमा यस प्रजातिको बिरालो करिब ५ हजारको हाराहारीमा रहेको बताइएको छ । बासस्थान विनाश, चोरी शिकारका कारण यस प्रजातिको बिरालो संकटमा पर्दै आएको हो । शरीरको अंगका लागि यस प्रजातिको बिरालोको चोरी शिकार हुन गरेको विज्ञ बाताउँछन् ।
यो बिरालोले चराचुरुंगीको अण्डा, चराचुरुङ्गी, फलफूल खाने गर्दछ । नेपाल, भारत, चिन, मलेसिया, सिंगापुर लगायतका देशमा यो प्रजातिको बिरालो पाइन्छ । तराइदेखि उच्च पहाडी क्षेत्रसम्म पाइने यस प्रजातिको बिरालो नेपालमा करिब दुई हजार तीनसय मिटर उचाइसम्म पाइएको रेकर्ड छ । यस प्रजातिको बिरालो खोला किनार र बस्ती छेउछाउमा बढी बस्न मन पराउँछ । दिउँसो भन्दा रातमा यो जनावर सक्रिय रहन्छ ।
पोखरामा पछिल्लो समयमा जंगली जनावर बढी घाइते अवस्थामा फेला परेको डिभिजनल वन कार्यालय पोखराका सहायक वन अधिकृत शालिकराम पराजुलीले बताए । यस्तो अवस्थामा फेला परेका जंगली जनावरलाई उद्धार केन्द्रमा उपचारका लागि पठाइने गरेको पनि उनले सुनाए । यसअघि पनि पोखराको यम्दीमा फेला परेको घाइते नीर बिरालो उपचारका क्रममा मरेको थियो ।
प्रतिक्रिया दिनुहोस !
