सुरुङमा फसेका चिनियाँ कामदारलाई ड्रोनकाे निरीक्षणपछि यसरी गरियाे उद्दार (फाेटाेसहित)

नुवाकोट : टिमुरेमा निर्माणाधिन रसुवागढी जलविद्युत आयोजनाको सुरुङको प्रवेशद्वारमा बिहीबार राति ड्रोन क्यामेरामार्फत स्थलगत अनुगमनपछि उद्धार गरिएको हो ।

गोसाइकुण्ड गाउँपालिका वडा नं. २ टिमुरे नजिकै निर्माणाधिन १११ मेगावाट क्षमताको सो आयोजनाको सुरुङ प्रवेशद्वारा  गएराति ढुंगासहितको सुख्खा पहिरो गएपछि ६ चिनियाँसहित १७ जना मजदुर रातभर सुरुङभित्रै थुनिएका थिए । जोखिम हुने देखिएपछि ड्रोनको माध्यमबाट पहिरोको अवलोकन गरी उनीहरुको उद्धार गरिएको रसुवा प्रहरी प्रमुख तथा प्रहरी नायव उपरीक्षक भाग्येन्द्रपुरुष ढकालले जानकारी दिए ।

सुरक्षाकर्मीसहितको टोलीले १७ जनालाई सकुशल उद्धार गरेको हो । रसुवाका प्रमुख जिल्ला अधिकारी अर्जुन भण्डारीका अनुसार अडिट ४ टनेलको मुखमा सुख्खा पहिरो जाँदा एकजना स्काभेटर चालक घाइते छन् ।

ड्रोन क्यामेरा उडाएर पहिरोको स्थलगत निरीक्षणपछि पहिरोमा फसेकाहरुको उद्धार गरिएको थियो । पहिरोमा चिनियाँ कामदारहरु छि होङ्ग, वाङ्ग पिङ्ग, हुएंग हु छिङ, लिउ अहि योङ्ग, हाउङलाङ्ग जुङ्ग, यिङ्य क्युएंगलगायत १७ जनालाई सुरक्षाकर्मीसहितको उद्धार टोलीले सकुशल उद्धार गरेको हो ।

पहिरोमा परेर सुरुङभित्र थुनिएका नेपाली कामदारहरु देववहादुर दर्लामी, रुद्र ठाडा, कर्णबहादुर घर्ती, धनवहादुर ओली, जनकवहादुर राना, गोविन्द पुन, टेकबहादुर थापा, कुशल श्रेष्ठ, रत्नसिह पुजारा, अर्नुनकुमार रोक्का र निमासेदर तामाङलाई सकुशल उद्धार गरिएको रसुवाका प्रमुख जिल्ला अधिकारी अर्जुन भण्डारीले जानकारी दिए ।योजनाको पहिरो गएको क्षेत्र बाहेक अन्य क्षेत्रमा नियमित काम भइरहेको छ । पहिरो नियन्त्रणका लागि सुरक्षाको काम भइरहेको आयोजनाले जनाएको छ ।