बागलुङ : बागलुङको पश्चिम ढोरपाटन नगरपालिका र बडिगाड गाउँपालिकाको सिमानामा बनेको कृत्रिम ताल आसपासमा पहिरोको जोखिम बढेको छ ।
वर्षा यामसँगै तालमा पानीको बहाव बढेकाले मध्यपहाडी लोकमार्ग कटानमा पर्दै गएको छ । कतिपय स्थानमा सडक भासिनै थालेको छ । सडक भासिएर पहिरो खसेमा गत वर्ष पहिरोले थुनिएर बनेको कृत्रिम ताल फुट्न सक्ने खतरा देखिएको छ । गत वर्ष सोही पहिरोमा परी एक महिलाको ज्यान समेत गएको थियो ।
पहिरोले विद्युतको केन्द्रीय प्रसारण लाइनका पोल र तारहरुमा समेत क्षति पु¥याएको छ । विद्युतका पोल र तार सडकमा छरपस्ट भएको र पहिरोका कारण मध्यपहाडी लोकमार्ग समेत अवरुद्ध हुन थालेको हो ।
स्थानीय दिनेश शर्मा भन्छन्, ‘तलबाट कृत्रिम तालले सडक भासिने अवस्था र माथिबाट पहिरो खस्ने दुवै जोखिम बढेको छ । अहिले सम्भावित दुर्घटना जोखिमलाई ध्यानमा राखेर सडक छेउतर्फ ढुङ्गा राखेर कुनातर्फबाट सवारी र पैदलयात्रुलाई आवत जावतको व्यवस्था मिलाइएको छ ।’
गत वर्ष भदौ २९ गते राति लाकमार्ग भन्दा ५०० मिटर माथिबाट भिषण पहिरो खस्दा बडिगाड खोला करिव ६ घण्टा थुनिएर ताल बनेको थियो । जसलाई स्थानीयले तुरतुरे ताल नाम दिएका थिए । लगभग तिन सय मिटर लामो ढुङ्गे ड्याम हुँदा त्यसले वर्षे खोला पनि थेग्न सक्ने अनुमान गरी ताल फुटाइएको थिएन ।
तुरतुरे पहिरोको केही भाग चर्किएकै अवस्थामा छ । यो तालमा हिउददेखि केही दिन अघिसम्म दैनिक डुंगा सयर गराएर स्थानीय कुमाल समुदायले आम्दानी समेत गर्दैआएका थिए ।
तुरतुरे क्षेत्र, बडिगाड गाउँपालिका र ढोरपाटन नगरपालिकाको सङ्गम स्थल हो । माथिबाट पहिरो खसेमा ढोरपाटन नगरपालिकाको भाग डुवानमा पर्ने र ताल फुटेमा बडिगाड लगायत गुल्मीका तटीय क्षेत्रमा ठूलो क्षती पुग्ने देखिएको भिमगिठे प्रहरी चौकीका इन्चार्ज प्रहरी नायव उपरीक्षक ऋनबहादुर वैदारले बताए । उनी भन्छन्, ‘पहिरो खस्ने क्रम जारी छ, जुनसुकै बेला ठूलो पहिरो खस्न सक्ने जोखिम बढेको छ । अहिले प्रहरीलाई ड्युटीमा राखेर आवश्यक सजगता अपनाइएको छ । तालको दुवै तर्फ जोखिमबारे सन्देशमूलक बोर्ड राख्ने तयारी पनि छ ।’
प्रतिक्रिया दिनुहोस !
