नुवाकोट : पार्टीको नीतिप्रति असहमति जनाउँदै विप्लव नेतृत्वको प्रतिबन्धित पार्टी नेकपाका दुईजना कार्यकर्ताले आत्मसमर्पण गरेका छन् ।
सरोज न्यौपाने र विष्णु भण्डारीले मंगलवार जिल्ला प्रशासन कार्यालय नुवाकोटमा उपस्थित भइ आत्मसमर्पण गरेका हुन् । आफू सहभागी विप्लव समुहले हिंसात्मक गतिविधि गरेको भन्दै त्यस्ता गतिविधिमा उनीहरुको असहमति छ ।
गोरखा आरुघाट गाउँपालिका–७ का ३६ वर्षीय सरोज र सुर्खेतको वीरेन्द्र नगरपालिका–४ का १९ वर्षीय विष्णु भण्डारीले जिल्ला प्रशासनमा उपस्थित भइ लिखित रुपमै आत्मसमर्पण गरेका हुन् ।
प्रमुख जिल्ला अधिकारी द्रोण पोखरेल, जिल्ला प्रहरी प्रमुख तथा प्रहरी उपरीक्षक कृष्णबहादुर पल्लिमगर र पत्रकारसमक्ष उनीहरुले आफूहरुको सुरक्षित जीवनयापनको मागसमेत गरेका छन् । यसअघि आफूहरुले वैकल्पिक शक्तिका रुपमा नेकपालाई लिएको भए पनि अब त्यस्तो नगर्ने उनीहरुले प्रतिवद्धता जनाएका छन् ।
सरोज सशस्त्र प्रहरीका पूर्व हवल्दार र खेलाडी प्रशिक्षक समेत हुन् । गत २०६७ साल चैतबाट प्रहरी सेवा छाडेका उनी गत बैशाख २६ गते हेटौंडाबाट विप्लव समुहमा प्रवेश गरेका थिए । साथै यसै वर्ष एसईई उत्तिर्ण गरेका विष्णु चार महिनादेखि विप्लव समुहमा आवद्ध रहेको बताए । प्रहरी प्रमुख तथा प्रहरी उपरीक्षक कृष्णबहादुर पल्लिमगरले उनीहरुको सुरक्षामा ध्यान दिने बताए ।
प्रतिक्रिया दिनुहोस !
