बागलुङ : बागलुङ जिल्लाको ताराखोला गाउँपालिका देशभरमै स्रोत साधनमा धनी मानिन्छ । स्थानीय स्रोत साधनको सम्भावनाले मात्र होइन, संस्कृतिले पनि धनी छ । यहाँ अरु गाउँमा भएका ऐतिहासिक परम्परागत कला संस्कृतिभन्दा भिन्न, पृथक र अनौठा लाग्ने संस्कृति अहिले पनि प्रचलनमा छन् । जसमध्येको एक हो भुस पोल्ने पर्व ।
ताराखोला गाउँपालिकाको २ अर्गलमा मनाइने परम्परागत चाड हो यो। यो हरेक वर्षको कात्तिक अन्तिम साता यहाँका मगर समुदायले मनाउने गरेका छन् । पाल्पाको अर्गलीबाट बसाई सरी आएका मगरले खोरिया फाँडेर झारपात पोली अन्नबालीको खेती सुरु गरेको सम्झनामा यो पर्व मनाउने गरिन्छ ।
अर्गली मगरहरुले घामको झुल्कोसँगै विधिवत रुपमा पूजाअर्चना गरी भुस पोल्न सुरु गर्दछन् । उनीहरुले यो पर्वको अवसरमा वर्षभरि मृत्यु भएका पितृहरुको सम्झानामा पितृ पूजा समेत गरेर वर्ष दिनको दुःख समेत फुकाउने गर्दछन् ।
कहिलेदेखि भुस पोल्न थालिएको हो भन्ने बारेमा एकिन जानकारी नभएपनि पूर्खाको प्रचलनअनुसार आफूहरुले पनि निरन्तरता दिएको शिक्षक सूर्य घर्तीले जानकारी दिए । यस वर्ष ताराखोला गाउँपालिकाले भुस पोल्ने पर्वमा गाउँपालिकामा सार्वजनिक बिदा समेत दिएको छ। यो समयमा भुस पोलेर छापे खनेपछि वर्षभरीका लागि दुःख फुकेको मानिने प्रचलन छ ।
विशेषगरी अर्गलमा भुस पोलिए पनि ताराखोला क्षेत्रभरमै एकै समयमा गरिन्छ । सुरुमा अर्गलमा भुस पोलेर धुवा देखिए पछि सोही समयमा पारि हिलमा भुस पोल्ने र हिलमा भुस पोलेको देखिएपछि तारखोलामा भुस पोल्ने गर्दछन् ।
यो मेला अनौठो मानेर हेर्न जाने क्रम वर्षेनी बढ्दो क्रममा रहेको स्थानीय बताउँछन्। भुस पोल्ने पर्वको अवसरमा स्थानीय अर्गल खेलकुद विकास मञ्चले विशेष मेलाको समेत आयोजना गर्दै आएको छ। 
प्रतिक्रिया दिनुहोस !
