गोरखा : गोरखाका दुईवटा प्रहरी चौकी विगत पाँच वर्षदेखि त्रिपालभित्रबाट सेवा दिइरहेका छन्। भाडामा लिएको चौकीको घर पनि भूकम्पले भत्किएपछि त्यहाँ कार्यरत प्रहरीले शान्ति सुरक्षाको काम त्रिपालभित्रबाटै गरिरहेका छन् ।
जिल्लाका ४१ वटामध्ये सीमा प्रहरी चौकी लार्के र जगत प्रहरीचौकी विगत पाँच वर्षदेखि त्रिपालभित्रै रहेको जिल्ला प्रहरी प्रमुख एसपी ओम अधिकारीले जानकारी दिए । चौकी रहेको भाडाको घर २०७२ सालको भूकम्पले भत्काइदिएपछि दुवै चौकीका प्रहरी त्रिपाल टाँगेर कार्यसम्पादन गरिरहेको उनले बताए ।
चुमनुब्री गाउँपालिका ४ नाम्रुङस्थित लार्के चौकीमा असईको कमाण्डमा आठजना कार्यरत छन् । सईको कमाण्डमा १५ जना प्रहरी कर्मचारीको दरबन्दी रहे पनि चौकी स्थापना कालदेखि नै असईको कमाण्डमा चलिरहेको हो ।
हिमाली क्षेत्रको सो चौकीमा कार्यरत प्रहरी त्रिपालभित्र कष्टपूर्ण रुपमा बसिरहेका वडा अध्यक्ष पेमाडुण्डुप लामाले बताए । चौकीका लागि घर भाडामा लिन खोज्दा पनि लामो समयदेखि प्रयास असफल भइरहेको उनले बताए । 'पहिले बाहालमा थियो, अहिले पालमा छ, 'लामाले भने, 'चौकी स्थापना भएदेखि चौकीको नाममा एकरोपनी दुई आना जग्गा छ तर भवन छैन । आफ्नै भवन नभए पनि भाडामा घर लिएर चौकी राख्न पहल गरियो, तर सकिएन।'
प्रक्रिया पूरा गरेर माग गर्दा पनि चौकीलाई घरमा सार्न नसकिएको लामाले बताए । 'तीनवटा घर भाडाको कोटेसन चाहिन्छ भनेकाले जिल्ला प्रहरी कार्यालयमा त्यही अनुसारको कागज पेश गरेको हो तर भाडामा पनि राख्न सकिएको छैन,' उनले भने, 'प्रहरीलाई एउटा टेलिभिजन र टेबुल राखिनुपर्यो भनेर गाउँ कार्यपालिकामा निवेदन दिँदा गाउँपालिकाले समेत बेवास्ता गर्यो ।'
राज्यको सुरक्षा निकायलाई राज्यले नै बेवास्ता गरेको भन्दै उनले दु:ख व्यक्त गरे । हिउँ पर्न थालेपछि त्रिपालमा बसि सक्नु नहुने चौकीका इञ्चार्ज असई प्रेम बानियाँले जानकारी दिए । 'चारपाँच फिटसम्म बाक्लो हिउँ पर्छ । त्रिपालले धान्नै नसकेर भत्किन्छ,' उनले भने, 'लामो समयसम्म हिउँ पग्लिदैन । पालबाट पानी चुहिएर सुत्नै सकिदैन।'
सो चौकीले चुमनुब्री गाउँपालिकाको २, ४ र ५ साबिक ल्हो, प्रोक र बिही गाविसको शान्ति सुरक्षाको जिम्मेवारी सम्हाल्दै आएको छ । सीमा प्रहरी चौकीको जिम्मेवारी ठूलो भए पनि अवस्था नाजुक रहेको एसपी अधिकारीले बताए । जिल्लाका ४१ वटा प्रहरी इकाइमध्ये १७ वटा मात्रै आफ्नै भवनमा रहेको उनले बताए ।
प्रतिक्रिया दिनुहोस !
