पृथ्वीनारायण शाह गोरखाबाट काठमाडौं हिँडेको बाटोमा सेनाको पदयात्रा
पुष १८, २०७६ शुक्रबार १८:३७:०
गोरखा : ऐतिहासिक सम्पदाको संरक्षण गर्दै पर्यटन विकास गर्ने उद्देश्यले नेपाली सेनाले गोरखादेखि काठमाडौंसम्म एकीकरण पदयात्रा सुरु गरेको छ ।
राज्य एकीकरणका बेला पृथ्वीनारायण शाहले प्रयोग गरेको बाटोलाई एकीकरण पदमार्गको रुपमा विकास गर्न नेपाली सेनाको एक टोलील शुक्रबार बिहान गोरखा दरबारबाट यात्रा सुरु गरेको हो ।
गोरखा, धादिङ, नुवाकोट हुँदै पृथ्वी जयन्तीको दिन पुस २७ गते काठमाडौँ पुग्ने उद्देश्यका साथ एकीकरण पदमार्गमा यात्रा सुरु गरेको रणसिंह दल गण गोरखाका गणपति उज्वल केसीले जानकारी दिए ।
नेपालको राष्ट्रिय झण्डा, टर्च लाइट, नेपाली सेनाको पाँच प्रथम कम्पनी श्रीनाथ, कालिबक्स, पुरानो गोरखा, बर्दबहादुर र सबुजको झण्डासहित सेनाको टोली पदयात्रामा निस्किएका थिए।
टोलीमा ३० जना नेपाली सेना, १० जना पृथ्वीनारायण शाहाकालीन पोशाकका गुरुजीका पल्टन, ६ झण्डाधारी, एक जना टर्च लाइटबाहक, ब्याण्ड र नौमती बाजासहित सह सेनानी इन्द्रबहादुर खत्रीको नेतृत्वको टोलीले पदयात्रा सुरु गरेको हो ।
टोली गोरखाको अश्राङ, बोर्लाङ, बोर्लाङघाट हुँदै धादिङको सेनालाई उक्त झण्डा, टर्च हस्तन्तरण गरेर फर्कनेछ । धादिङको टोलीले नुवाकोटको टोलीलाई यात्रा हस्तान्तरण गर्नेछ भने नुवाकोटको टोली पुस २७ गते काठमाडौँमा हुने पृथ्वी जयन्तीको कार्यक्रममा सरिक हुन पुग्ने कार्यक्रम तय गरिएको गणपति उज्वल केशीले बताए ।
कार्यक्रममा पृतनापति भण्डारीले इतिहासको संरक्षण र प्रर्वद्धन गर्ने नेपाली सेनाको योजना अनुसार तत्कालीन सेनाले प्रयोग गरेका मार्गको पहिचान गर्न पदयात्रा गरिएको बताए । कोट, किल्ला, गढीको इतिहास सेनासँग जोडिएकाले प्रधानसेनापतिको मार्गनिर्देशन अनुसार कार्यक्रम तय भएको विदाइ कार्यक्रममा उनले बताए ।
सेनासँग जोडिएका इतिहासको संरक्षण गर्ने दायित्व सेनाको पनि भएको उनको भनाइ छ । नगरप्रमुख राजनराज पन्तले इतिहास जर्गेना गरेर अघि बढ्दा देशलाई पनि फाइदा हुने र केही सिक्ने अवसर मिल्ने भएकाले अहिले सेनाले पदयात्रा गरेको ‘रुट’लाई पर्यटकीय पदमार्गको रुपमा विकास गर्न सहयोग गर्ने बताए ।
भीमसेन थापा गाउँपालिका अध्यक्ष ईश्वर पाण्डेले पदमार्ग पर्ने गाउँपालिका भएकाले नेपाली सेनालाई पदमार्गको संरक्षण र प्रर्वद्धनको काममा सघाउने बताए ।
प्रमुख जिल्ला अधिकारी देवेन्द्र लामिछानेले पृथ्वीनारायण शाहको स्मरणमा पदयात्रा गर्नु प्रचारप्रसार र सम्झनाको राम्रो माध्याम भएको बताए ।
प्रतिक्रिया दिनुहोस !
