गोरखा : विगत पाँच वर्षदेखि अनाधिकृत रुपमा गोरखामा धर्म प्रचार गर्दै आएका दुईजना ताइवानी नागरिकलाई जिल्ला निष्कासन गरिएको छ। बिनजेश भिषा र भ्रमण भिषामा आएर बुद्धधर्म प्रचार गर्ने काम गर्दै आएका उनीहरुलाई जिल्ला प्रशासन कार्यालय गोरखाले मंगलबारै जिल्ला निष्कासन गरेको हो।
ताइवानका ३६ वर्षीय सिनचेङ मेङ र २३ वर्षका ग्वान टिङ उलाई जिल्ला छाड्न निर्देशन दिएको प्रमुख जिल्ला अधिकारी सुरेन्द्र पौडेलले जानकारी दिए। ‘सिनचेङ मेङको काठमाडौंमा होटल रहेछ। तर काठमाडौंमा नबसी गोरखामा धर्म प्रचारमा सक्रिय हुदै आएका रहेछन्’, प्रजिअ पौडेलले भने, ‘अर्का ग्वान टिङलाई पनि उनले लिएर भ्रमण भिजामा ल्याएका रहेछन्।
एउटा प्रयोजनका लागि आएर फरक काम गरेको पाइएकाले हामीले जिल्ला छाड्न निर्देशन दिएका हौं।’ सिनचेङ मेङको काठमाडौंको नयाँ बानेश्वरमा हङजिन नामक होटल रहेको भेटिएको छ।
प्रतिक्रिया दिनुहोस !
