विराटनगर : भारतको पश्चिम बंगाल सरकारले सोमबारबाट २७ मार्चसम्मका लागि ‘लकडाउन’ को घोषणा गरेको छ । कोरोना भाइरसको संक्रमण फैलने क्रम बढेपछि सोमबार बिहान ५ बजेबाट पश्चिम बंगालका सम्पूर्ण शहरमा लकडाउनको घोषणा गरेको हो ।
भारतीय अनलाइन लाइभ हिन्दुस्तानका अनुसार पश्चिम बंगाल सरकारले आइतबार दिउँसो सो निर्णय गर्दै यो कडाईका साथ लागु हुने जनाएको छ । पश्चिम बंगालमा फेला परेका कोरोना भाइरस संक्रमित चौथो बिरामीको अवस्था गम्भीर बनेको र संक्रमितको संख्या बढ्ने भएकाले सरकारले लकडाउनको निर्णय लिएको पश्चिम बंगालका मुख्य सचिव राजीव सिन्हाले बताए ।
यस अवधिमा राज्यमा सबै यातायात, हाटबजार, अफिस, कलकारखाना बन्द रहने छन् भने पिउने पानी, बैंक, टेलिफोन, इन्टरनेट, खाद्य, सब्जी, राशन पसल, अस्पताल, स्वास्थ्य केन्द्र, औषधी पसल र विद्युत् सेवा खुल्ला रहने मुख्य सचिव सिन्हाले बताए । ‘अतिआवस्यक बस्तु खुल्ला छ, नागरिक सबै घरमा बस्न आग्रह गरिएको छ, अति आवस्यक परेमात्रै बाहिर निस्कन निर्देशन छ,’ सचिव सिन्हाले भने ।
कोरोना संक्रमित चौथो बिरामीको अवस्था गम्भीर
पश्चिम बंगालमा फेला परेका कोरोना भाइरस संक्रमित चौथो बिरामीको अवस्था गम्भीर रहेको छ । २४ वर्षीय बिरामीको सघन कक्षमा राखेर उपचार भइरहेको जनाइएको छ । बिरामी पश्चिम बंगाल परगना जिल्लाको दम दम क्षेत्रका हुन् ।
उनलाई गत शनिबार (मार्च २१) मा कोरोना भाइरस संक्रमित भएको पुष्टि भएको थियो । सुक्खा खोकी र ज्वरो आएर मार्च १ मा अस्पताल पुगेका उनी सोही समयदेखि अस्पताल भर्ना भएका थिए ।
प्रतिक्रिया दिनुहोस !
