गोरखा : शिकार खेल्न जङ्गलमा गएका एक युवाको लडेर मृत्यु भएको छ । चुमनुब्री गाउँपालिका ३ देवल गाउँका कान्छा गुरुङको भीरबाट लडेर मृत्यु भएको जिल्ला प्रहरी कार्यालय गोरखाले जानकारी दिएको छ ।
३० वर्षका गुरुङको गत चैत ३० गते धार्चे गाउँपालिका १ तिर्पाङडाँडाबाट लडेर घटनास्थलमै मृत्यु भएको प्रहरीले जनाएको छ । उनको साथमा अरु पाँचजना पनि शिकार खेल्न गएका प्रहरीले जनाएको छ ।
सिर्दिबास प्रहरीचौकीका प्रहरी र देवल गाउँका सात जना स्थानीयबासी घटनास्थलतर्फ गएका छन् । घटनास्थल फिलिम गाउँबाट मानवबस्तीबिहिन जंगलजंगलै दुई दिनको बाटो टाढा रहेको वडाअध्यक्ष रामकुमार गुरुङले बताए ।
‘प्रहरी र गाउँले खाद्यान्न र भाँडाकुँडा बोकेर घटनास्थलतर्फ गएका छन्’, उनले भने, ‘जहाँ खानेपानी पाइन्छ त्यही खाना बनाएर खानुपर्छ, जहाँ ओढार छ, त्यहीँ सुत्नुपर्छ ।’ उनीहरु चारदिनपछि मात्र फर्कने र विस्तृत विवरण जानकारी हुने उनले बताए ।
प्रतिक्रिया दिनुहोस !
