युवक मृत्यु प्रकरणः वडाध्यक्षसहित १६ जनाविरुद्ध अनुसन्धान सुरु

दमौली : गत बिहीबार एक युवक मृत भेटिएको प्रकरणमा तनहुँ प्रहरीले जन प्रतिनिधिसहित १६ विरुद्ध जाहेरी दर्ता गरेर अनुसन्धान थालेको छ । बुधबार घरबाट साथीसँग घुम्न निस्किएका भानु १ भन्सारका २१ वर्षका प्रवीण गुरुङ भोलिपल्ट दिउँसो भानु नगरपालिका ६ नाब्रुँगको फापरखोल्सामा मृत भेटिएका थिए । 

स्थानीय युवासँगको झडपमा मृत्यु भएका ठानिएका गुरुङको मृत्युको घटनामा आफन्तले किटानीसहित भानु ६ का वडाध्यक्ष प्रकाश मल्ल ‘टाइसन’सहित १६ जनाविरुद्ध कर्तव्य ज्यान मुद्दामा अनुसन्धानको माग गर्दै जाहेरी दिएका थिए । प्रहरीले अन्य संदिग्ध युवालाई पक्रे पनि वडाध्यक्षलाई भने पक्रेको थिएन ।

तर घटना शंकास्पद भएको भन्दै आफन्तले जनप्रतिनिधिको घटनामा संलग्नताको आरोप लगाएपछि अध्यक्ष मल्ल आफैँ प्रहरी सम्पर्कमा आएका थिए । घटना थाहा भए पनि लुकाउन भूमिका खेलेको भन्दै स्थानीयले यसमा मल्लको जिम्मेवारी रहेको आरोप लगाएका थिए । मल्ल आफैं सम्पर्कमा आएपछि प्रहरीले आइतबार उनीहरुविरुद्ध तनहुँ जिल्ला अदालतबाट कर्तव्य ज्यान मुद्दामा अनुसन्धानका लागि म्याद लिएको छ । ‘जाहेरी परेका सबैविरुद्ध अदालतबाट म्याद लिएर अनुसन्धान थालेका छौं,’ प्रहरी उपरीक्षक विनोद शिलवालले भने । आफन्तले जनप्रतिनिधिविरुद्धको जाहेरी दर्ता गर्न नमानेको भन्दै आलोचना भएपछि प्रहरीले मल्लविरुद्धको जाहेरी दर्ता गरेको थियो । 

घरबाट साथीभाईसँग नाब्रुङ गएका प्रवीणले स्थानीय एक होटलमा खाजा खाएका थिए । साथीहरुसँग नै रहेका बेला स्थानीय युवासँग होटलमा खाजा खाने क्रममा उनीहरुबीच विवाद भएको स्थानीयको भनाइ छ । विवाद बढेपछि झडप हुन लागेकाले चार जनाको संख्यामा गएका युवा भागेका थिए । तीन युवा घर फर्किए पनि प्रवीण नफर्केपछि परिवारले खोजी थाल्दा घटनाको भोलिपल्ट दिउँसो खोल्सामा शव भेटेको थियो । 

अरु तीन जना घर फर्किए पनि प्रवीण भोलिपल्टसम्म घर न आएपछि खोजी गर्दा भीरबाट केही तल खोल्सामा उनको शव भेटिएको प्रहरी नायब उपरीक्षक लिलाराज लामिछानेले बताए । प्रहरीका अनुसार उनको टाउको र कानमा चोट छ । भाग्ने क्रममा उनी भीरबाट खसेको वा झडपमा ज्यान गएको अनुसन्धान भइरहेको प्रहरीको भनाइ छ ।  

त्यसयता घटनाको अनुसन्धान गर्न परिवारले दबाब दिएका छन् । उनीहरुले कुटपिटबाट हत्या भएको भन्दै संलग्नताको आरोपमा स्थानीय युवाविरुद्ध जाहेरी दिएका थिए । तर घटनाबारे जानकारी भए पनि सार्वजनिक नगरेको भन्दै स्थानीय वडाध्यक्षमाथि पनि अनुसन्धान हुनुपर्ने माग स्थानीयले गरेपछि उनी प्रहरीको अनुसन्धान घेरामा आएका थिए ।