दमौली : लक डाउनकै अवधिमा तनहुँमा नेपाली कांग्रेसका भ्रातृ संगठनले दैनिकजसो प्रदर्शन गरेका छन् । सरकारविरोधी प्रदर्शनको सुरुवात नेपाल तरुण दल व्यास नगर समितिले मंगलबार गरेको थियो । उसले सरकारले लक डाउनकै अवधिमा पनि स्वास्थ्य सामग्री खरिदमा भ्रष्टाचार लगायतका मुद्दामा विरोध जनाएको थियो । सरकारले लक डाउन भने पनि यसबीचमा सांसदकै अपहरणसम्म भएको भन्दै तरुण दलले विरोध प्रदर्शन गरेको थियो ।
सांसद सुरेन्द्र चौधरीलाई अपहरण गरेको आरोप लागेका तनहुँ क्षेत्र नम्बर १ का सांसद कृष्णकुमार श्रेष्ठको गृह जिल्ला भएकाले पनि कांग्रेसले यस जिल्लाकेन्द्रित विरोधलाई झनै बढाएको देखिएको छ । तरुण दलले प्रदर्शन गरेको भोलिपल्टै विद्यार्थी मोर्चा नेविसंघ तनहुँले जिल्लाका एक सय ठाउँमा प्रदर्शन गरेको दाबी गरेको छ ।
१० वटै तहका एक सय बढी ठाउँमा विद्यार्थीहरुले सांसद श्रेष्ठमाथि कारबाहीको माग गर्दै प्रदर्शन गरेको नेविसंघ महामन्त्री दीपक भट्टराईले बताए । ‘जिल्लाकै सांसदमाथि अपहरणको आरोप लागेकाले घटनाको निष्पक्ष अनुसन्धान हुनुपर्छ भनेर तनहुँमा प्रदर्शन गरेका हौं,’ उनले भने ।
मंगलबारको प्रदर्शनको अन्त्यतिर प्रहरीले हस्तक्षेप गर्न खोजे पनि बुधबार भने जिल्लाका सहरी तथा ग्रामीण क्षेत्रमा कम सानो स्तरको विरोध प्रदर्शन गरिएको थियो । नेपाली कांग्रेसले पनि एक विज्ञप्ति निकालेर यस प्रकरणको अनुसन्धान माग गरेको थियो ।
प्रतिक्रिया दिनुहोस !
