दमौली : सोमबारबाट बिहान ८ बजेदेखि खुलेका दमौलीका बजार मध्याह्न १२ बजेभन्दा पछि पनि खुले । तर लक डाउनको अवधिमा खुलेका बजारका व्यवसायीले आधारभूत सुरक्षा मापदण्ड नअपनाउँदा यसले जोखिम बढाउने त्रास खडा भएको छ । व्यास नगरपालिकाले बिहान कम भिड हुने भन्दै ६ बजेबाट १० बजेसम्म सातामा छ दिन बजार खुलाउन दिएको समय व्यवसायीले समय अव्यवहारिक भएको भन्दै परिवर्तन गर्न माग गरेका थिए ।
व्यवसायीकै मागअनुसार समय परिवर्तन पनि भयो । तर समय परिवर्तन भए अनुसार व्यवसायीले पूरा गर्नु पर्ने सुरक्षाका शर्तहरु पालना नभएको देखिएको छ । धेरैजसो फेन्सी पसलमा भिडभाड देखिएको छ । तर सामान्य दुरी व्यवस्थापन र हात धुने वा स्यानिटाइजरको व्यवस्था गर्न अधिकांश व्यवसायी चुकेका छन् । घर भाडा व्यवसायी संघका केन्द्रीय सदस्य आकाश अधिकारी समय परिवर्तन भएकोमा खुशी छन् । ‘धेरै व्यापारीलाई पहिले नगरपालिकाले दिएको समय मिलेको थिएन,’ उनले भने,‘अहिलेको समय ठिक छ तर हामीले हाम्रो कर्तव्य पुरा गर्न सकेनौं ।’ उनले नगरपालिकाले माग सम्बोधन गरेसँगै व्यवसायीले पनि सुरक्षाका मापदण्ड पूरा गर्नुपर्नेमा चुकेको बताए । ‘हामीले गर्नुपर्ने काम भने पूरा गरेनौं,’ उनले भने ।
बजारका सबै व्यवसायीले नगरे पनि केहीले भने पसलका अगाडि साबुनले हात धुने प्रबन्ध गरेका पनि छन् । बिन्दु इम्पेक्सका सञ्चालक एवं तनहुँ उद्योग वाणिज्य संघ दमौली बजार एकाइका कोषाध्यक्ष बिन्दु श्रेष्ठ आफूले हात धुने व्यवस्था गरे पनि सबैले नगरेकाले गर्नुपर्ने बताउँछन् । ‘मैले त अगाडि नै हात धुने व्यवस्था गरेको छु,’ उनले भने,‘धेरै ग्राहक आफैँ सचेत भएर आएका छन् ।’
उनले यसो भने पनि दमौलीका अधिकांश फेन्सी र अरु पसलका सञ्चालकले सामाजिक दुरी अनि हात धुने तथा स्यानिटाइज गर्ने विषयमा ध्यान दिएका छैनन् । व्यास नगरपालिकासँग बजार खुलाउने सहमति गरेको तनहुँ उद्योग वाणिज्य संघ दमौली बजार एकाइले अनिवार्य रुपमा हात धुने वा स्यानिटाइजर लगाउने व्यवस्था गर्नका लागि सबैमा अनुरोध पनि गरेको थियो । सफा सडक टोल सुधार समितिका अध्यक्ष कुमारमोहन श्रेष्ठ सबैले आफू र ग्राहक दुवैको सुरक्षामा विशेष ध्यान दिनुपर्ने बताउँछन् । ‘बजार खुल्ने समय परिवर्तन हुँदा सुरक्षा पनि अपनाउने सहमति भएको थियो,’ उनले भने,‘व्यवसायीका छाता संस्थाका प्रतिनिधिले पनि गरेको अनुरोध पालना भएको छैन ।’ उनले आफू र ग्राहक दुवैको सुरक्षाका लागि पनि यसो हुनु जरुरी रहेको तर्क गरे ।
व्यास नगरपालिका लगायत तनहुँका तहहरुमा भारतबाट आउनेको संख्यामा कमी आउन सकेको छैन । यस्तोमा बजार पनि खुला हुन थालेपछि सुरक्षा जोखिम बढिरहँदा व्यवसायी पनि आफू र ग्राहक दुवैको सुरक्षाका लागि गम्भीर नबन्ने हो भने तीन जनालाई देखिइसकेको कोभिड संक्रमणको जोखिम अझ बढ्नेमा विज्ञको चिन्ता छ । चिकित्सक डा. रामप्रवोध मण्डल सामाजिक दुरीका अलावा हातको सफाइको अभ्यासमा व्यवसायी चुकेका खण्डमा जोखिम बढ्ने बताउँछन् । ‘आफू र अरुको सुरक्षा दुवैका लागि यो जरुरी छ,’ उनले भने ।
प्रतिक्रिया दिनुहोस !
