धादिङ : ओमनमै पीसीआर गरेर नेगेटिभ आएपछि नेपाल फर्किएका धादिङका एक जनामा कोरोनाको संक्रमण पुष्टि भएको छ । उनीसँगै आएका १ सय ६६ जना शंकाको घेरामा परेका छन् ।
धादिङको त्रिपुरासुन्दरी गाउँपालिका वडा नं ५ का एक युवासहित १ सय ६६ जना नेपाली गत असार १ गते सलाम एयरको फ्लाइट नम्बर ओभी ४२७ मार्फत नेपाल आएका थिए । उनीसँगै धादिङकै ज्वालामुखी गाउँपालिकाका अर्का एक युवक पनि छन् ।
त्रिभुवन विमानस्थलबाट नेपाली सेनाले बसुन्धरा स्थित होल्डिङ सेन्टरमा लगेर सेनाकै गाडीमार्फत सोही दिन रात १२ बजे मलेखुसम्म ल्याइदिएका थिए । स्थानीय प्रहरीले राती १ बजे ती युवकलाई सदरमुकाम ल्याएका थिए । उनीसँगै ज्वालामुखी गाउँपालिकाका अर्का एक युवा पनि ओमन देखि नै सँगै आएको संक्रमित युवकले टेलिफोनमा बताए ।
राती १ बजेदेखि बिहान ८ बजेसम्म धादिङबेशी पुछारबजारको प्रहरी बिटमै सुरक्षाकर्मीको निगरानीमा बसेपछि गाउँपालिकाले पठाएको गाडीमा उनी गाउँमा पुगेका थिए । गाउँकै देउराली आधारभूत विद्यालयको क्वारेन्टाइनमा २ दिन बसेका उनी उक्त क्वारेन्टाइनमा भारतबाट आएको तर पीसीआर नगरेको ब्यक्ति पनि बस्ने भएपछि घरमै क्वारेन्टाइन बस्ने गरी गएका थिए । घर नजिकैको टहरोमा क्वारेन्टाइनमा बसिरहेका बेला वडा अध्यक्षमार्फत उनले आफूलाई संक्रमण भएको थाहा पाएका थिए ।
त्रिपुरा सुन्दरी गाउँपालिकाका स्वास्थ्य संयोजक यमबहादुर श्रेष्ठले ओमनबाट आएका व्यक्तिमा पीसीआर गराउँदा कोरोनाको संक्रमण देखिएको पुष्टि गरेका छन् । ओमनबाट आउने कसैलाई संक्रमण भएको खण्डमा कन्ट्याक ट्रेसिङ गर्न सजिलो हुने भनेर होल्डिङ सेन्टरमै नेपाली सेनाले नयाँ सिम उपलब्ध गराएको थियो । संक्रमण पुष्टि भएको खण्डमा तत्काल सम्पर्क गरिने तथा यसरी सिम लगेका जोकोहीलाई सक्रमण भेटिएमा कन्ट्रयाक ट्रेसिङ गरेर चेकजाँच गर्ने सजिलो हुने भने पनि आफूलाई संक्रमण भएको ३ दिन भइसक्दासमेत सँगै आएका अरु कसैलाई जानकारी नदिइएको र आफूलाई पनि सेनाले केही जानकारी नगराएको उनले बताए ।
‘मसँगै आएकाले मलाई फोन गरेर सोध्न थालिसके तर नेपाली सेनाले कसैलाई केही सोधेकै रहेनछ, मसँगै आएका अरुको अवस्था के हुन्छ त ?’, ती युवाले भने, ‘मसँगै आएका अरु साथीले मलाई फोन गरेर सोधेका छन्, तपाईंलाई सक्रमण भएछ, खै हाम्रो त खोजी भएकै छैन । अब हाम्रो अवस्था के हुन्छ त भन्छन्, म आफैँ छक्क छु । मैले के उत्तर दिनु ?’
गत असार ६ गते शनिबार उनले सल्यानटार प्राथमिक स्वास्थ्य केन्द्र स्वाव दिएका थिए । उनको गत मंगलबार संक्रमण पुष्टि भएको रिपोर्ट आएको थियो । ‘जेठ ३२ गते ओमनमा पीसीआर गर्दा नेगेटिभ आएको छ, असार ६ गते नेपालमा चेक गर्दा रिपोर्ट पोजिटिभ आएको छ’, उनले भने, ‘अब कहाँको रिपोर्टलाई आधिकारिक मान्ने मैले ।’
प्रतिक्रिया दिनुहोस !
